«Адәныҟатәи аусқәеи ашәарҭадара аполитикеи рзы Евроеидгыла Иреиҳаӡоу ахаҭарнак  Жозеп Боррель  Қырҭтәыла даҭаауеит цәыббра  7-8 рзы», — иануп Евроеидгыла адәныҟатәи аимадаразы амаҵзура адырраҿы.

Апресс-релиз ишану ала, Боррель уажәтәи изинмчқәа рҳәаақәа ирҭагӡаны Қырҭтәыла раҧхьатәи аофициалтә визит мҩаҧигоит.  Боррель ивизит хықәкыс иамоуп  Қырҭтәыла евроинтеграциа апроцесс алацәажәареи адәныҟаполитикатәи арегионалтәи зҵаарақәа рзы агәаанагарақәа реиҭныҧсахлареи.

Авизит аҳәаақәа ирҭагӡаны,  Боррель дидикылоит Қырҭтәыла ахада Саломе Зурабишвили. Иара убас,  Евроеидгыла Иреиҳаӡоу ахаҭарнак Қырҭтәыла аҧыза-министр Иракли Ҕарибашвили диҧылоит. Аиҧылара ашьҭахь аганқәа рхаҭарнакцәа апресс-конференциа мҩаҧыргоит.

Боррель Қырҭтәыла адәныҟатәи аусқәа рминистр Илиа Дарчиашвилигьы диҧылоит.

«Иара убас,  Евроеидгыла авице-ахада,   апарламентаҿ аполитикатә партиақәа зегьы рхаҭарнакцәа дырҧылоит,  атәылауаҩратә уаажәларра алахәылацәа рҟны адискуссиа мҩаҧигоит», — иануп  Евроеидгыла адәныҟатәи аимадаразы амаҵзура адырраҿы.