Қырҭтәыла аҧыза-министр Иракли Кобахиӡе аофициалтә визитла Казахстантәи ареспубликаҟа ддәықәлеит.

Қырҭтәыла аҧыза-министр ипресс-маҵзура адыррақәа рыла, Казахстан Ахьыҧшымра аханаҿ Қырҭтәыла аҧыза-министр иҧылара аофициалтә церемониа мҩаҧгахоит.

Иракли Кобахиӡе дидикылоит Казахстан ахада Касим-Жомарт Токаев. Аплан иарбоуп Қырҭтәыла аҧыза-министри Казахстантәи ареспублика ахадеи ишиашо, иара убас, ирҭбаау аформатқәа рҿы реиҧыларақәа, убри анеҩс, ҩ-тәылак русбарҭақәа еиуеиҧшым аусхкқәа рҿы аусеицура амеморандумқәа рыбжьарҵоит.

Аофициалтә визит аҳәаақәа ирҭагӡаны, Қырҭтәыла аиҳабыра рнапхгаҩы Казахстантәи ареспублика аҧыза-министр Олжас Бектенов диҧылоит. Аиҧылара рхы аладырхәоит аҩ-тәылак реиҳабырақәа рылахәылацәа.

Казахстанҟа идәықәлаз аҧыза-министр аделегациа ицуп. Аделегациа иалоуп авице-аҧыза, адәныҟатәи аусқәа рминистр Мака Боҷоришвилии, аекономикеи иҭышәынтәалоу аҿиареи рзы аминистр Мариам Қвривишвилии, аҧсабара ахьчареи ақыҭанхамҩеи рзы аминистр Давиҭ Сонҕулашвилии, аиҳабыра радминистрациа аиҳабы Леван Жоржолиании.