Хәажәкыра  8-10 рзы Қырҭтәыла иаҭаауеит ОБСЕ Апарламенттә Ассамблеиа Иреиҳаӡоу аделегациа. Ари атәы аарыцҳаит ОБСЕ Апарламенттә ассамблеиа апресс-маҵзура аҟынтәи.

Аинформациа инашу ала, аделегациа анапхгара азиуеит Ассамблеиа ахантәаҩы Пере Жоан Понс Сампьетро.  Аделегациа иалоуп: Апарламенттә Ассамблеиа авице-хантәаҩи Аахыҵ Кавказ азҵаарақәа рзы ахаҭарнак ҷыдеи  Луис Грача (Португалиа);  аполитикатә зҵаарақәеи ашәарҭадареи рзы акомитет авице-хантәаҩы  Евросима Пеиович (Монтенегро); адемократиеи, ауаҩытәыҩса изинқәеи, агуманитартә зҵаарақәеи рзы акомитет авице-хантәаҩы  Кристин Блоуер (Британиа Ду); ОБСЕ Апарламенттә Ассамблеиа амаӡаныҟәгаҩ хада Роберто Монтелла.

Аинформациаҿы ишазгәаҭоу ала, авизит аҳәаақәа ирҭагӡаны, ОБСЕ Апарламенттә Ассамблеиа алахәылацәа аҵыхәтәантәи аамҭазы иҟалаз ахҭысқәеи, адемократиеи, ашәарҭадареи, арегионалтә ҭышәынтәалареи ирызку азҵаарақәеи рзы ақырҭуа рколлегацәа рҟны агәаанагарақәа реиҭныҧсахлара рылшоит.