Евроеидгыла алалара ма Евразиа аекономикатә еидгылаҿы аанхара азҵааразы Шәамахьтәыла излауа ала ирласны амилаҭтә референдум амҩаҧгара ахымҧадара иазку апозициа ҳазыразуп, – иануп  Урыстәылеи, Беларуси, Казахстани, Ҟиргизтани рлидерцәа еицыҟарҵаз аҳәамҭаҿы.

Евразиа аекономикатә еидгыла иалахәы атәылақәа рлидерцәа иҟарҵаз аҳәамҭа инақәыршәаны,  Евроеидгыла алаларазы Шәамахьтәыла аҽазыҟаҵара иадҳәаланы Евразиа аекономикатә еидгыла иалоу атәылақәа рекономикатә шәарҭадара аганахьала ицәырҵыр зылшо зҵакы дуу ашәарҭарақәа иазҧхьагәаҭаны, арҭ атәылақәа ироур зылшо азарал аҽацәыхьчаразы, аӡбара ҳадаҳкылеит  Евразиа аиҳабырабжьаратә хеилак алахәылацәа,  2026 шықәса ҧхынҷкәын азы имҩаҧысраны иҟоу иреиҳаӡоу Евразиатәи економикатә хеилак анеҩстәи аилатәараҿы  ажәахә шыҟарҵо  азы  Шәамахьтәылазы Евразиа аекономикатә еидгыла иазку аиқәшаҳаҭра аанкылара иахылҵыр зылшо алҵшәақәа ирызкны.

Астана имҩаҧгаз аиҧылараҿы, Евразиа аекономикатә еидгыла атәылақәа рлидерцәа, Евроеидгылахь Шәамахьтәыла алалара апланқәа ирыдҳәалоу аҭагылазаашьа иалацәажәеит.