«Ашәарҭадара акәӡам Европазы зегьы реиҳа идуу проблема иҟоу, аекономикеи аконкуренциалшареи ауп ахадара злоу», — иҳәеит Венгриа аҧыза-министр Виктор Орбан Гаага имҩаҧысуа НАТО асаммитахь даннеи.

Виктор Орбан иҳәамҭала, Урыстәыла ареалтә шәарҭароуп ҳәа игәы иаанагом, избанзар, иара ишиҳәаз ала,  «ҳара иаҳа ҳаҕәҕәоуп».

Украина НАТо алаларазы аперспектива амоума ҳәа ианиазҵаа Орбан ишиҳәаз ала, НАТО изакәызаалак ак ала Украина иадҳәалам.

«НАТО изакәызаалак ак ала Украина иадҳәалам, Урыстәыла еиҧшҵәҟьа Украинагьы НАТО иалахәым. Абри аҭагылазаашьа ахьчароуп сара хықәкыс исымоу», — иҳәеит Орбан.

Иара убас,  Виктор Орбан  Дональд Трамп иполитика ибзианы дахцәажәеит.

«Жәларбжьаратәи аиҿкаара аиқәырәшараҿы иаҳа-иаҳа аҟәышра убарҭоуп, Америка ахада дҟәышуп, уажәааны уи убарҭан Ирани Израили реимак дшахылаҧшуа алагьы. Иара дҟәышуп, убри аҟынтә,  аҿыц еибашьрақәа раамҭа маҷхеит, ажәытә еибашьрақәа амч рцәыӡит, уи иара ибзоуроуп», — иҳәеит  Виктор Орбан.