Аҳәынҭқарратә бызшәа амш зҵакы дуу арыцхәқәа иреиуп, уи абзоурала, Қырҭтәыла, милаҭтә ҷыдарақәа рыхьчареи  аҳәынҭқаррара арҕәҕәареи алшеит, – илҳәеит Қырҭтәыла ахада Саломе Зурабишвили Орбелианиаа рхан аҿы Ахатәы бызшәа амш инамаданы имҩаҧгаз ауснагӡатә аҿы.

«1978 шықәса мшаҧы 14 инаркны ҳара асоветтә ампыҵахалара аҟынтә ахақәиҭреи ахьыҧшымреи рахь ацара ҳалагеит ҳәа уҳәар ҟалоит.  Аконституциаҿы ахатәы бызшәа астатус ахьчара аидеиа амилаҭтә ҵысра ду ахылҵит. Ари ахҭыс егьырҭ аҭоурыхтә  арыцхәқәеи аиааирақәеи  иреиуп   – 1917 шықәсазы ауахәама автокефалиа аиҭашьақәыргылареи, 1918-и 1991-и шықәсқәа рзы Ахьыҧшымра акт адкылареи.  Ҳҳәынҭқарра иахьагьы абарҭ аиааирақәа ирықәгылоуп. Урыстәыла 221 шықәса  рыҩныҵҟа ақырҭуа бызшәеи Қырҭтәыла  ахьыҧшымреи раҧыхра иазҿлымҳан, аха, арусификациа апроцесс шымҩаҧысуазгьы, Қырҭтәыла ахатә  16 ашәышықәсатәи алитературатә ҭынхеи  анбанқәа хҧеи  рыхьчареи, ақырҭуа бызшәа амодернизациеи алшеит», — илҳәеит Қырҭтәыла ахада.

Саломе Зурабишвили лажәақәа рыла, иахьа Урыстәыла Аҧсны аҵакырадгьыл аҿы ақырҭуа бызшәа иаҿагыланы иқәҧоит.

«Урыстәылатәи ампыҵахалатә режим амшала, Аҧсны, аҧсуа бызшәагьы ақырҭуа бызшәагьы еиҟараны иҧкуп.  Аҧсышәала ицәажәо ауааҧсыра есышықәса иаҳа -иаҳа имаҷхоит.  Галтәи араион иқәынхо ақырҭуаа ашколқәа рҿы  ақырҭшәала аҵара азин рымам.

Иахьа Украинагьы ахатә  дгьыли, аҳәынҭқарреи, ахатә бызшәеи аиқәырхара иазықәҧоит. Ҳара ҳрыдгылоит, абри аҩыза аҽазышәара ҕәҕәа ала рхықәкқәа зегьы шынарыгӡо аадыруеит. Иахьатәи амш дара ирзаҳкуеит», — илҳәеит Қырҭтәыла ахада.