Зыӡбахәы ҳәоу азакәан адкылареи ақәныҟәареи атәылауаҩратә уаажәларреи, иҳәынҭқарратәым аиҿкаарақәеи, зхы иақәиҭу АИХқәеи  ҧырхагара рзаанагоит, ҳара уи даараӡа ҳаргәамҵуеит, — иҳәеит Қырҭтәыла иҟоу Евроеидгыла ацҳаражәҳәаҩ Павел Ҳерчински.

Иара иажәақәа рыла, атәылауаҩратә уаажәларреи, иҳәынҭқарратәым аиҿкаарақәеи, зхы иақәиҭу АИХқәеи роуп адемократиа шьаҭас иамоу.

«Евроеидгыла еснагь атәылауаҩратә уаажәларра иадгылон, ҳара еснагь иҳәынҭқарратәым аиҿкаарақәа аус рыцаауан, насгьы, ҳәарада, ажәа ахақәиҭреи АИХқәа рхақәиҭреи ҕәҕәала ҳадгылоит. Зыӡбахәы ҳәоу азакәан адкылареи ақәныҟәареи атәылауаҩратә уаажәларреи, иҳәынҭқарратәым аиҿкаарақәеи, зхы иақәиҭу АИХқәеи  ҧырхагара рзаанагоит, ҳара уи даараӡа ҳаргәамҵуеит. Уажәы апарламентаҿ ари азакәанпроект ахәаҧшра иалагоит,  ҳара,  Евроеидгыла ахьӡала,   абри алагамҭатә етап азы ҳгәаанагара ааҳарҧшыр ҳҭахын», — иҳәеит  Павел Ҳерчински.

Иара убас,  Ҳерчинский игәаанагарала,  аҵысра «Жәлар рымч» ринициатива иадҳәаланы  Евроеидгыла иалоу атәылақәа рыцҳаражәҳәаҩцәеи Қырҭтәыла апарламент ахантәаҩи реиҧылара аҵакы ду аман. Ацҳаражәҳәаҩ иажәақәа рыла, аиҧылараҿы еилыккаа ирҳәеит ари аинициатива Евроеидгыла анормақәеи апринципқәеи ишрышьашәалам.

«Уажәааны зҵакы дуу аиҧылара хыркәшан. Қарҭ аус зуа Евроеидгыла атәылақәа рыцҳаражәҳәаҩцәа зегьы ҳҽеидкыланы абрахь ҳааит.  Апарламент ахантәаҩы Атәым агентцәа ирызку азакәанпроект  алацәажәаразы ааҧхьара ҳаиҭеит. Қарҭ аус зуа ацҳаражәҳәаҩцәа зегьы ҳгәаанагара ҳҳәеит.  Ҳара гәаартыла ҳаиҿцәажәеит.   Атәым агентцәа ирызку аинициатива Евроеидгыла анормақәеи апринципқәеи ирышьашәалам, апарламент ахантәаҩы уи иаҳҳәеит. Иара убас иаҵшьны иазгәаҳҭеит ари аинициатива Қырҭтәыла иаиоуз 12 абжьагарақәа руакы  ишашьашәалам. Апарламент ахантәаҩы Қырҭтәыла абри аҩыза азакәан заҭаху иазкны иаргументқәа ҳаиҳәеит. Ари азҵаара алацәажәара наҳагӡоит. Ари аинициатива азакәанс иҟамлап ҳәа ҳгәыҕуеит.  Астатус иазкны сара сакәӡам аӡбара здызкыло. Сара исҳәар исылшо акоуп – ари аинициатива Евроеидгыла анормақәеи апринципқәеи ирышьашәалам. Ҳара апарламент ахантәаҩы уи иаартны иаҳҳәеит», — иҳәеит Павел Герчински.