ОБСЕ Апарламенттә ассамблеиа ахада Пере Жоан Понс Сампиетро ажурналистцәа данырҧылоз ишиҳәаз ала, авизит алҵшәақәа хадақәа иреиуп аганқәа зегьы рацәажәара алшара. 

Иара иажәақәа рыла, Апарламенттә ассамблеиа акыраамҭа иалагӡаны аганқәа зегьы аус рыцнауан,  аҵыхәтәантәи ҩымш рзы ицәыргаз алҵшәақәа зегьы абри аусеицура иабзоуроуп.

«Раҧхьа иргыланы иазгәасҭар сҭахуп ари авизит алҵшәа шахылҵыз,  ҳара гәаартыла ҳаицәажәеит. Насгьы,  ҳвизит раҧхьатәи амш азы ахҵәацәа ҳарҧылеит,  арҭ ауаа уажәгьы аҩныҟа изыхынҳәуам.

Ҳвизит алҵшәақәа хадақәа иреиуп аганқәа зегьы рацәажәара алшара. Апарламенттә ассамблеиа акыраамҭа иалагӡаны аганқәа зегьы аус рыцнауан,  аҵыхәтәантәи ҩымш рзы ицәыргаз алҵшәақәа зегьы абри аусеицура иабзоуроуп. Ҳара аоппозициатә партиақәа рхаҭарнакцәеи, аҧыза-министри,  атәыла ахадеи, апарламент ахантәаҩи ҳарҧылеит. Адиалог аҟамзаареи, абаикоти, амчылареи  ҳалацәажәон. Ҳара ҳаиаҿкаара иарбанзаалак амчылара иақәыӡбоит, аха, адемократиатә системақәа атәылауаа рзинқәа рыхьчароуп. Аганқәа зегьы ҳанырҧылоз адиалог аҟамзаара ҳалацәажәон. Иаартны исҳәар сҭахуп  — ари атәылаҿ адиалог иҟам.  Ҳгәаанагарақәа еиҧшымзар ауеит, аха, напхгагас иҳамоуп  2024 шықәсатәи ажәахә, уи абжьагарақәа рынагӡаразы аус еицаауроуп», — иҳәеит ОБСЕ Апарламенттә ассамблеиа ахада.