Леван Махашвили – Аӡәы аконкреттә закәан игәамҧхозаргьы, уи азинтә база авсра, адәныҟатәи ақәыҕәҕәара, ма атәыла аҩныҵҟа аилаҩынтәра адгылара ахылымҵроуп
57 ҳәынҭқаррақәа рҟынтә 34 ҳәынҭқаррақәа – 60 наӡына, Қырҭтәыла иадҳәаланы «Москватәи амеханизм» ахархәара иақәшаҳаҭымхеит ,– иҳәеит Қырҭтәыла апарламентаҿ иҟоу евроинтеграциа азҵаарақәа рзы акомитет ахантәаҩы Леван Махашвили ОБСЕ Апарламенттә ассамблеиа Аполитикатә зҵаарақәеи ашәарҭадареи рзы Акомитет хада 33-тәи есышықәсатәи асессиаҿы данықәгылоз.
Махашвили иҳәамҭала, ицәыргаз арезолиуциа апроект, ҷыдала 20-тәи апункт, узыргәамҵша атенденциа аанарҧшуеит.
« Ицәыргаз арезолиуциа апроект узыргәамҵша атенденциа аанарҧшуеит, избанзар, Москватәи амеханизм иазку ажәахә аҿы аҭагылазаашьақәа арбоуп ишьақәырҕәҕәоу афактқәа раҳасабала, аха, уи аамҭазы, ажәахә ахаҭаҿгьы иаҵшьны иазгәаҭоуп абри зегьы ахарадҵарақәа мацара шракәу. Иаҳҳәап, ҷыдала ҳаргәамҵуеит 20-тәи апункт. Уаҟа ишану ала, «амчылара ауаа рыргәаҟранӡа инеит». Москватәи амеханизм ажәахә аҿы абри аҩыза аформулировка иҟам. Насгьы, 55-тәи апункт аҿы иаҵшьны иазгәаҭоуп абри зегьы ахарадҵара мацара шакәу. Убри аҟынтә, ҳара аҳәара ҟаҳҵоит абри аҳәоу 20-тәи апункт ианышәхырц, избанзар, уи ажәахә аихшьаала аполитикатә интерпретациа аҭароуп иаанаго», — иҳәеит Леван Махашвили.
Иара иажәақәа рыла, азинтә нормақәа – иарбанзаалак ихьыҧшым аҳәынҭқарра, Қырҭтәылагьы, ахатә алхратә процессқәеи, аполитикатә системеи, асоциал-економикатә ҭышәынтәалареи адәныҟатәи аҽалагалара аҟынтә рыхьчаразы иамоу азакәантә хархәага заҵәуп.
“ Аӡәы аконкреттә закәанк игәамҧхозаргьы, уи азинтә база авсра, адәныҟатәи ақәыҕәҕәара, ма атәыла аҩныҵҟа аилаҩынтәра адгылара ахылымҵроуп. Иззымдыруа ирасҳәар сҭахуп уажәы Аартызаара иазку азакәан Қырҭтәыла Аконституциатә аӡбарҭеи, иара убас, Ауаҩытәыҩса изинқәа рзы Европатәи аӡбарҭеи рҿы ишахәаҧшуа. Уи ииашоу аиуристтә мҩоуп. Ари азҵаара ОБСЕ Апарламенттә ассамблеиа ма егьырҭ жәларбжьаратә еиҿкаарақәа рполитикатә хықәкқәа рзы ахархәара ҟалом, избанзар, аҵыхәтәаны, абри зегьы ОБСЕ Апарламенттә ассамблеиа ахьӡ ҧхасҭанатәоит ”, – иҳәеит Махашвили.