«Зыӡбахәы ҳәоу апартиа аибашьра ишазҿлымҳау убарҭоуп дара Урыстәыла атәылауаа ирҿагыланы излагаз акампаниа ҿыц алагьы», — иҳәеит апартиа  «Ақырҭуа гәахәтәы» ахантәаҩы Иракли Кобахиӡе.

Иара ишазгәеиҭаз ала,  лабҿаба иубарҭоуп Қырҭтәылаҿ аибашьра апартиа шыҟоу, дара хықәкык ауп ирымоу  – Қырҭтәыла аибашьра  аҽаланагалар рҭахуп.

«Атәыла аиҳабыра ирылшо зегьы ҟарҵоит ҳтәылеи ҳажәлари аибашьра иацәцарцаз.   Аибашьра апартиа хықәкыс иамоу убарҭоуп Қырҭтәыла иҟоу Урыстәыла атәылауаа ирҿагыланы излагаз акампаниа алагьы.  Адискриминациеи ашовинизми зныҧшуа абри акампаниа иалахәып  «Амилаҭтә ҵысра» ирыдгыло иҳәынҭқарратәым аиҿкаарақәагьы. Украинаҿ Урыстәыла имҩаҧнаго аибашьра арқьиара ҟалом, уи ихьыҧшым аҳәынҭқарра ахьыҧшымреи аҵакырадгьылтә акзаареи аилагароуп.  Ҳара даҽазнык ари акт ҳақәыӡбоит. Аха, убри амшала акгьы зхарам атәылауаа рхьырхәра ҟалом, ҳара уи ҳзақәшаҳаҭхом. Ишәгәалаҳаршәар ҳҭахуп Урыстәыла 800 нызқьҩык раҟара ақырҭуаа ишынхо.  Импыҵахалоу аҵакырадгьылқәа рҿгьы 10 нызқьҩык ақырҭуаа инхоит.  Урҭ реиҳара Қырҭтәыла иатәылауаауп. Ҳазынтәгьы ибзианы еилаҳкаароуп Урыстәыла атәылауаа ишакәым ала ҳрызныҟәар,  100 нызқьҩык ақырҭуаа ашәарҭара ишҭаҳаргыло. Аха,  акампаниа авторцәа ари афакт иазҧхьагәарҭом,  абри апроблема ақәыргыларагьы рплан иаҵанакәазар ҟалап», — иҳәеит Кобахиӡе.