Иахьазы аҭагылазаашьа злаҟо ала, Қырҭтәыла акандидат астатус анашьара аперспектива дууп, Саломе Зурабишвили уи лара илыбзоуроушәа аалырҧшыр лҭахуп, – иҳәеит апартиа  „Ақырҭуа гәахәтәы“ ахантәаҩы Иракли Кобахиӡе.

Иара иажәақәа рыла, Саломе Зурабишвили Қырҭтәыла Аконституциа еилалгеит, аиҳабыра рықәшаҳаҭрада аҳәаанырцә авизитқәа рымҩаҧгара далагеит.

Кобахиӡе ишиҳәаз ала, Қырҭтәыла Аконституциа инақәыршәаны, Қырҭтәыла аиҳабыра мацара роуп атәыла аҩныҵҟатәигьы адәныҟатәигьи аполитика амҩаҧгаразы азинмчы змоу.

„Саломе Зурабишвили изаралымхо ахәмарра лҽалалгалар лҭахуп. Ганкахьала, лара ибзиаӡаны илдыруеит уажәазы аҭагылазаашьа злаҟо ала, Қырҭтәыла акандидат астатус аиуразы аперспектива ду шамоу, Зурабишвили уи лара илыбзоуроушәа аалырҧшыр лҭахуп. Қырҭтәыла Аконституциа инақәыршәаны,  Аконституциа аилагаразы азинтә механизм заҵәык ауп иҟоу  – аимпичмент. Иаци иацжәаци ҳара изныкымкәа иазгәаҳҭеит Аконституциа шеилагоугьы, уажәтәи аполитикатә ҭагылазаашьаҿы аимпичмент апроцедура алагара шыҟамло. Аимпичмент аҵыхәанӡа амҩаҧгаразы  100ҩык адепутатцәа рбыжьқәа аҭахуп, убри аҟынтә, арадикалтә оппозициаа рыда ари апроцедура хзынагӡом.

Аха, уезгьы, апартиа аполитхеилак аилатәараҿы, Қырҭтәыла ахада лимпичмент апроцедура алагаразы аӡбара ҳадаҳкылеит. Раҧхьа иргыланы, ҳара, Қырҭтәыла Аконституциа аҿаҧхьа уи азыҳәан аҭак ҳаҧхықәуп. Қырҭтәыла Аконституциа аилагара афакт ақәҿыҭра амҭара ҟалом, уи азинтә ҳәынҭқарреи, азакәан аиҳаӡареи, адемократиатә конституциатә системеи раҧыхроуп иаанаго, ҳара уи ҳзақәшаҳаҭхом“, – иҳәеит Кобахиӡе.

Иара иажәақәа рыла, аимпичмент апроцедура лабҿаба аанарҧшуеит арадикалтә оппозициеи Саломе Зурабишвили рхықәкқәа шеиҧшу, дара Қырҭтәыла амилаҭтә интересқәеи Қырҭтәыла ала акандидат астатус аиуреи ишаҿагыло.

„Аимпичмент апроцедура алагаразы, иааиуа амшқәа рзы, апарламенттә аиҳара  алахәылацәа рнапынҵақәа еизганы, Қырҭтәыла Аконституциатә аӡбарҭа иашьашәалоу аконституциатә арзаҳал алаҳҵоит“, – иҳәеит Кобахиӡе.