Апартиа “Ақырҭуа гәахәтәы” ахантәаҩы Иракли Кобахиӡе Қырҭтәыла иҟоу ЕАШ ацҳаражәҳәаҩ Келли Дегнан иҟалҵаз аҳәамҭа иазкны азҵаара изықәдыргылеит. Дегнан ишазгәалҭаз “Асанкциақәа ихадароу аинструментуп. Ԥшьҩык аӡбаҩцәа ирықәырҵаз авизатә санкциақәа ишгәалашәоит, урҭ Қырҭтәыла адемократиатә мҩа, аӡбарҭатә система аҿиара иаԥырхагон” ҳәа.

Иракли Кобахиӡе иажәақәа рыла, ашаҳаҭгақәа рыда аӡбаҩцәа асанкциақәа рықәҵара адкылашьа амам.

„Ашаҳаҭгақәа рыда аӡбаҩцәа асанкциақәа рықәҵара аконституциа аилагароуп. Ари азин аӡәгьы имам. Ҳара ҳтәылаҿ ари зин иҟам, аҳәаанырцәа аҟынтә 2012 шықәсанӡа иҟаза ҭагылазаашьа архынҳәа рҭахызар, ари аӡәгьы изыҟаҵом. Ари ииашам. 2012 шықәсанӡы “Амилаҭтә ҵысра” арҭ аметодқәа рхы иадырхәон, ашаҳаҭгақәа рыда аӡбаҩцәа ихьдырхәон. Уажәы ари ҳтәылаҿ адкылашьа амам“, – иҳәеит Кобахиӡе.