Евроеидгыла ала мшаҧы 11 рзы Қырҭтәыла иаҭаз азҵаабҕьыц ахарҭәааразы имҩаҧгатәу ауснагӡатәқәа ирылацәажәеит Евроеидгылашҟа Қырҭтәыла алалара иазку аиҳабыратә комиссиа 62-тәи аилатәараҿы, уи, аҧыза-министр Иракли Ҕарибашвили инапхгарала, аиҳабыра радминистрациаҿы имҩаҧысит. 

 Аиҳабыра рнапхгаҩы ишазгәеиҭаз ала,  азҵаабҕьыц ишахәҭоу еиҧш, иаамҭаны ахарҭәааразы, аусбарҭақәа зегьы еиқәшаҳаҭны, активла ари апроцесс иалахәызароуп.  

„Хәажәкыра 3 рзы ҳара Евроеидгыла алаларазы азыҳәамҭа ҟаҳҵеит, уи абзоурала, Қырҭтәылеи Евроеидгылеи реизыҟазаашьақәа рҿы аетап ҿыц иалагеит. Ҳәарада, ари аӡбара аҭакҧхықәра ду ҳаднаҵоит, ҳара Евроеидгыла алалара апроцесс аҿы ҳҽазышәарақәа ҳарҕәҕәароуп. Иахьатәи ҳаизараҿы мшаҧы 11 рзы иҳауз азҵаабҕьыц ахарҭәааразы имҩаҧгатәу ауснагӡатәқәа ҳрылацәажәоит. Адәныҟатәи аусқәа рминистр Лиуқсембург Еврокомиссар Варҳеи диҧылеит. Иахьа ҳара ҳаизеит еицымҩаҧаагаша ауснагӡатәқәа ҳрылацәажәарц азыҳәан. Аусбарҭақәа зегьы ари апроцесс иалахәызароуп, азҵаабҕьыц излауа ала ирласны, ибзианы ахарҭәааразы ҳаиқәшаҳаҭны аус аауроуп, ихарҭәаау адокумент иаамҭаны ирзыхынҳәтәуп“, – иҳәеит аҧыза-министр.  

Азҵаабҕьыц иадҳәаланы аилатәараҿы ажәахәҟаҵаҩы хадас дыҟан адәныҟатәи аусқәа рминистр Илиа Дарчиашвили. Иара ишазгәеиҭаз ала, Евроеидгыла ала Қырҭтәыла азҵаабҕьыц аҭара ала Қырҭтәылеи Евроеидгылеи реизыҟазаашьақәа рҿы аетап ҿыц иалагеит.  Ишдыру ала, азҵаабҕьыц роуит Ассоциациатә трио атәылақәа зегьы  – Қырҭтәылеи, Украинеи, Молдовеи, ари апроцесс зыӡбахәы ҳәоу аформат аҿы инагӡахоит.  

Ақырҭуа аган, Евроеидгылантә ироуз азҵаабҕьыц иаамҭаны ихарҭәааны, европатәи апартниорцәа ирыздырхынҳәуеит, Еврокомиссиа аихшьаала цәырнагоит рашәара анҵәамҭазы. Аусуратә гәыҧ аформат аҿы, аусбарҭақәа зегьы рылахәызаарала имҩаҧысуа азҵаабҕьыц ахарҭәаара апроцесс дахылаҧшуеит аҧыза-министр ихаҭа.