Қырҭтәыла Аҧыза-министр Иракли Ҕарибашвили, Бриуссель ивизит аҳәаақәа ирҭагӡаны, Бельгиа аҳра Аҧыза-министр Алеқсандр Де Кро диҧылеит. Бельгиа аҳра Аҧыза-министр иусмҩаҧгарҭаҿы имҩаҧгаз аиҧылара аан  иаҵшьны иазгәаҭан Қырҭтәылеи Бельгиеи рыбжьара қәҿиарала имҩаҧысуа ҩ-ганктәи аусеицуреи,  евроинтеграциа апроцесс аҿы атәыла аихьӡарақәеи.

Аҧыза-министр ишазгәеиҭаз ала, Қырҭтәыла аиҳабыра иахәҭоу ауснагӡатәқәа мҩаҧыргоит   2024 шықәсазы атәыла Евроеидгыла алаларазы аофициалла азыҳәамҭа аҟаҵара алшарц азыҳәан.

Аганқәа рхаҭарнакцәа  COVID-19 апандемиа иахылҵыз апроблемақәа ирзааҭгылеит, ари аганахьла ҷыдала иалкаан  аекономикатә ауадаҩрақәа. Аиҧылара алахәылацәа иаҵшьны иазгәарҭеит апандемиа аҿагылара апроцесс аҿы авакцинациеи азеиҧш ҽазышәареи ҵакыс ирымоу.  Дара ишырҳәаз ала, атәылақәа зегьы иаамҭаны аекономика аиҭашьақәыргылареи,  етапла анормалтә ҧсҭазаара азыхынҳәреи  азы еиҟараны алшара роурц азыҳәан,  авакцина, хымҧада,   ииашаны ирзыршазароуп.

Қырҭтәыла Аҧыза-министр ишиҳәаз ала,  апандемиа аамышьҭахьтәи аетап азы аиҳабыра рзы аҧыжәара рымазаауеит аекономикатә азҳареи,  аусуратә ҭыҧқәа раҧҵареи,  ишиашоу атәым инвестициақәа рыдыҧхьалареи,  атуризм асектор аиҭашьақәыргылареи.  Иаҵшьны иазгәаҭан Бельгиаҟны ахәаахәҭра-економикатә аимадарақәа рырҕәҕәареи абизнесқәа рыбжьара аусеицура арҭбаареи аҵакы.

Иара убас, аганқәа рхаҭарнакцәа, ауаҩытәыҩса изинқәеи аиашаӡбареи аусхкқәа рҿы ҩ-ганктәи аизыҟазаашьақәагьы ирылацәажәеит.  Ишазгәаҭаз ала,  аҵыхәтәантәи аамҭазы, арегионалтә, иара убас, афедералтә аҩаӡараҟны аусеицура ала, ахәыҷқәа рзинқәеи, агендертә зинеиҟарареи, аиҭашьақәыргыларатә аиашаӡбареи,  ашколтә аҵареи аусхкқәа рҿы азнеишьа ииаша атемазы, алҵшәа зхылҵыз иакымкәа апроектқәа мҩаҧган. Аганқәа рхаҭарнакцәа аҵареи акультуреи аусхкқәа рҿы аусеицура иалацәажәеит. Ишазгәаҭаз ала,  2023 шықәсазы Қырҭтәыла, асас ҷыда астатусла, Бельгиатәи аҟазаратә фестиваль   – Европалиа иалахәхәоит.

Аиҧылараҿы хшыҩзышьҭра рызун ашәарҭадара аганахьала арегион аҿы иҟоу аҭагылазаашьеи,  агеополитикатә асахьа ҿыци, импыҵахалоу аҵакырадгьылқәа рҿы аҭагылазаашьеи.  Алеқсандр Де Кро Иракли Ҕарибашвили изышьақәирҕәҕәеит Бельгиа аҳра Қырҭтәыла европатәи евроатлантикатәи интеграциа ишақәшаҳаҭу, Қырҭтәыла ахьыҧшымреи аҵакырадгьылтә акзаареи ишадгыло.

Аиҧылара рхы аладырхәит Қырҭтәыла авице-аҧыза, адәныҟатәи аусқәа рминистр Давиҭ Залкалиании, аекономикеи иҭышәынтәалоу аҿиареи азы аминистр Наҭиа Турнавеи,  Бельгиеи Лиуқсембурги иҟоу Қырҭтәыла ацҳаражәҳәаҩ,  Евроеидгылаҿы Қырҭтәыла амиссиа анапхгаҩы Наталиа Сабанаӡеи.