Иракли Ӷарибашвилии, Гьыргәал Лилуашвилии, Оҭар Ԥарцхалаӡеи урҭ ирымадоу ааҩык рыҩнқәа рҿы аимдара мҩаԥган, – иҳәеит апрокуратураҿ имҩаԥгаз абрифинг аҿы апрокурор хада Гьаргь Гваракиӡе.

Апрокурор иажәақәа рыла, иԥшаауп еиуеиԥшым аелектронтә хархәагақәа, адокументациа, аԥара рацәаны.

“Ауаажәлар ринтерес ду иазыԥхьагәаҭаны, иашьҭанеиуа аинформациа алаҳарҵәар ҳҭахуп. Қырҭтәыла апрокуратура хада аусԥшааратә хәҭаҿы, Аҳәынҭқарратә шәарҭадаратә маҵзура антикоррупциатәи аҳәынҭқарратә шәарҭадаратә департаменти рҿы имҩаԥысуа еиуеиԥшым ашьаусԥшаарақәа рҳәаақәа ирҭагӡаны, иахьа, шьыжьамҭан, асааҭ 10:00 инаркны атәыла аҵакыраҿ аамҭакала 22 ҭыԥ рҿы зымҽхак ҭбаау ауснагӡатә мҩаԥган. Ауснагӡатә аҳәаақәа ирҭагӡаны ԥасатәи аԥыза-министр Иракли Ӷарибашвилии, Аҳәынҭқарратә шәарҭадаратә маҵзура ԥасатәи аиҳабы Гьыргәал Лилуашвилии, ԥасатәи апрокурор хада Оҭар Ԥарцхалаӡеи урҭ ирымадоу ааҩык рыҩнқәа рҿы аимдара мҩаԥган, иԥшаауп аԥара рацәаны, аелектронтә хархәагақәа, адокументациа”, –  иҳәеит Гьаргь Гваракиӡе.