Қырҭтәыла Адәныҟатәи аусқәа рминистр Илиа Дарчиашвили жәабран 26 рзы ЕАР ауаҩытәыҩса изинқәа рхеилак иреиҳаӡоу аҩаӡара змоу асегмент 55-тәи асессиаҿ дықәгылоит, – аарыцит Қырҭтәыла Адәныҟатәи аусқәа рминистрра аҟынтә.

Аусҳәарҭа аинформациала, аминистр Қырҭтәыла 2022-2030 шш. рзтәи ауаҩытәыҩса изинқәа рыхьчара амилаҭтә стратегиа дахцәажәоит, ааирԥшуеит ақырҭуа ган ари ахырхарҭала иҟанаҵаз ашьаҿақәа.

“Аминистр ахшыҩзышьҭра ҷыда азиуоит импыҵахалоу Аԥсни Цхинвалтәи арегиони рҿы ауаҩытәыҩса изинқәеи агуманитартә ганахьалеи иҟоу аҭагылазаашьа”, – иануп аминистрра аланарҵәаз аинформациа аҿы

Женева авизит аҳәаақәа ирҭагӡаны Қырҭтәыла Адәныҟатәи аусқәа рминистр ЕАР ауаҩытәыҩса изинқәа рыхьчара ахеилак ахада, ЕАР ауаҩытәыҩса изинқәа рыхьчара иреиҳаӡоу акомиссар, ЕАР ахҵәацәа иреиҳаӡоу ркомиссар, иколлега аминистрцәа дырԥылоит”, – иануп Қырҭтәыла Адәныҟатәи аусқәа рминистрра аҳәамҭа аҿы.