BBC  адыррақәа рыла,  Куба,    афатәаалыҵ ахә ацлареи афымца арцәареи амшала имҩаҧысуаз адемонстрациа ашьҭахь ,   адемонстрантцәа Акоммунисттә партиа аофис дырбгеит. 5ҩык аанкылоуп.

Ауаа атәылаҿы аекономикатә кризис иаҿагыланы акциақәа мҩаҧыргоит. Атәылаҿ лассы-лассы афымца дырцәоит,  афатәаалыҵи ахәшәқәеи рызхом.

Куба анапхгара рҳәамҭала,  ари акризис  Америка ишьақәнаргылаз анефҭ блокада амшала иҟалеит.

Куба ахада  Мигель Диас-Канель ишиҳәаз ала, ауаа рыҳәара азакәантә ашьаҭа амоуп,  аха,  амчылара ҟамлароуп.

Куба апротестқәа ҟалеит ари атәыла анапхгара Америка анапхгара рҟны аиҿцәажәарақәа анымҩаҧырго аамҭазы.

Уаанӡа Трамп ишьақәирҕәҕәеит Куба анапхгара рыҧсахра шиҭаху,  ари атәыла акризис ҕәҕәа иҭагылоуп ҳәа иҳәеит.

BBC аинформациа ишану ала,  Венесуела ахада  Николас Мадуро иаанкылара ашьҭахь,  Трамп венесуелатәи анефҭ Кубаҟа анагаразы ақәиҭымтәра шьақәиргылеит. Иара убас,  Куба анефҭ азызҭиуа иарбанзаалак атәыла атарифқәа рзышьақәыргылара ала дрықәмақарит.