Аҿагыларатә акциа ала иаԥылеит баҭымаа урыстәылатәи атуристцәа аманы Баҭымҟа ааиз акруизтә аӷба

Иаашаанӡа Баҭымтәи абаӷәазаҿ аҿагыларатә акциа мҩаԥысуан. Урыстәылатәи атуристцәа ахьыҟоу акруизтә аӷба Astoria Grande Баҭымтәи асқьала шьыжьымҭан, асааҭ 06:00 рзы аадгылеит.

Акциа алахәылацәеи азакәанхьчаҩцәеи изныкымкәа еиҿагылеит. Иаанкылоуп жәаҩык рҟынӡа. Асқьалаҿ азакәанхьчаҩцәа амобилизациа рзууп. Аҭыԥ аҿы иҟоуп “Амилаҭтә ҵысреи” егьырҭ аоппозициатә партиақәеи рхаҭарнакцәа.

Акруизтә аӷба атуристцәа аманы Баҭымҟа аара иадҳәаланы баҭымаа аҿагыларатә акциа амҩагара асааҭ 00:00 рзы иалагеит.