АИШ йæхи цæттæ кæны Гуырдзыстоны ныхмæ спайда кæна уыцы фæрæзтæй, се æхсæн уæлæмхасæн санкцитæ, – уый фæдыл АИШ-ы паддзахадон нымæрдар Энтони Блинкены расидæны ис фыст.

Энтони Блинкен хъусын кæны, цæмæй уый «карзæй тæрхон кæны «Гуырдзиаг Бæллиццы» æгъатыр æмæ æнæбындур тыхмидзинад Гуырдзыстоны æмбæстæгты, протестгæнджыты, медийы æмæ оппозицийы минæвæртты ныхмæ».

«АИШ 32 азæй фылдæр у Гуырдзыстон æмæ гуырдзиаг адæмы партнер. Нæ партнерад бындуриуæг кæны нæ иумæйаг уарзондзинадыл сæрибардзинад æмæ демократимæ æмæ фæндоныл Гуырдзыстон фенын евроатлантикон бинонты сконды. Гуырдзыстоны хицауадтимæ æмæ гуырдзиаг адæмимæ иумæ куыстам экономикæйы размæцыдыл, ахуырады системæйы фæхуыздæр кæныныл, хъахъхъæнынады гæнæнтæ фæбæрзонддæр кæныныл, афтæ дæр æнæнизхъахъхъæды æмæ хъæууон хæдзарады секторты рауæрæх кæныныл. АИШ уыд Гуырдзыстоны суверенитет æмæ территорион æнæхъæндзинады æнæфæцудгæ фарсхæцæг, æмæ нæ æнувыддзинад Гуырдзыстоны хъæбатыр адæмæн æмæ сæ евроатлантикон бæллицтæн æфсæйнагау фидар у.

АИШ карзæй тæрхон кæны «Гуырдзиаг Бæллиццы» æвирхъау æмæ æнæбындур тыхмидзинад Гуырдзыстоны æмбæстæгты, протестгæнджыты, медийы æмæ оппозицийы минæвæртты ныхмæ. Сидæм «Гуырдзиаг Бæллиццмæ» кæрон скæна йæ репрессивон тактикæйæн, се æхсæн æнæбары ахст æмæ физикон тыхмидзинадæй спайда кæнын критикты æрсабыр кæныны тыххæй. Мах уæлдай тынгдæр тыхсын кæнæм, барадхъахъхъæнджытæ адæмæн уæззау цæфтæ кæй æрхастой, уый тыххæй хъусынгæнинæгтæ. Сабырадон æмбырды æмæ сæ хъуыдытæ дзурыны сæрибардзинады бартæй пайда кæныны тыххæй чи ахст æрцæуа, уыдон хъуамæ æвæстиатæй ссæрибар уой, тыхæй æнæзакъонæй пайда кæныны тыххæй аххосджын чи у, уыцы бæрнон кусджытæ хъуамæ æххæстæй дзуапп дæттой.

АИШ æмзæрдæйæ лæууы гуырдзиаг адæмимæ æмæ сæ демокративон бæллицтимæ. Гуырдзыстоны демокративон процесстæ кæнæ институттæ чи хæлы – уый нымæцы, Гуырдзыстоны æмбæстæгты сабырадон æмбырды æмæ ныхасы сæрибардзинады бартæ чи æрæхгæны, уыдон хъуамæ дзуапп раттой. Дыууæфарсон æмкуыстдзинады фæдыл раздæр хъусынгонд алыварсон æркасты адарддæр кæнынæй дарддæр ма, АИШ йæхи цæттæ кæны спайда кæна уыцы фæрæзтæй, кæцытæ нæм ис, се æхсæн уæлæмхасæн санкцитæ дæр», – ис фыст Энтони Блинкены расидæны.