Евроцæдисы минæвæрттæ бадзырдмæ баххæсыдысты Уæрæсейы ныхмæ санкциты ноджы иу пакеты фæдыл, кæцы нысангонд у Уæрæсейы Украинæмæ æххæстмасштабон ныббырсты æртыккаг азы сæрмæ.

Санкциты нымæцы ис фыццаградон алюминийы импорты тобæ. Дипломатты ныхæстæм гæсгæ, Евроцæдис афтæдæр сау номхыгъдмæ бахæсдзæн 73 науы, кæцытæ нымад цæуынц Уæрæсейы «аууоны флоты» хайыл. Афтæмæй науты иумæйаг нымæц фæфылдæр уыдзæн 153 онг. Санкцитæм гæсгæ, уыдонæн тобæгонд у Евроцæдисы порттæм бацæуын æмæ Евроцæдисы лæггæдтæй пайда кæнын. Афтæ дæр уыдзæн гæнæн сау номхыгъдмæ бахæссын «аууоны флоты» науты хицæутты æмæ операторты, се æхсæн капитанты дæр.

Уымæй дарддæр ма, ног санкцитæ SWIFT электрон системæйæ 13 уырыссаг банкъы ахицæн кæндзысты æмæ аст уæрæсейаг медиа-фæрæзы эфирон лицензитæ æруромдзысты.

Раздæр хъусын кодтой, цæмæй 16-æм пакетмæ гæсгæ тобæ гæнæн ис æмæ бандава PlayStation æмæ Xbox хъазæн консолты Уæрæсемæ импортыл дæр. Медийы информацийæ, Уæрæсейы ныхмæ санкциты 16-æм пакет, æвæццæгæн, официалонæй сбæлвырд уыдзæн 23-æм февралы, Евроцæдисы фæсарæн хъуыддæгты министртæ Брюселы куы фембæлдзысты, уæд.