АИШ-ы президент Дональд Трамп сиды, цæмæй йæ фæнды «сыгъзæрин картæтæ» уæй кæнын райдайа фæсарæйнæгтæн, кæцыты фæнды АИШ-ы цæрын æмæ куысты бынæттæ саразын.

АИШ-ы президенты ныхасмæ гæсгæ, «сыгъзæрин картæйы» аргъ уыдзæн фондз милуан доллар.

Дональд Трамп куыд банысан  кодта, афтæмæй ацы уынаффæ гæнæн ис æмæ йæ тыхы бацæуа дыууæ къуырийы фæстæ.

“Мах фæнды  ауæй кæнæм  “Сыгъзæрин картæ”.  Ацы картæйыл æвæрдзыстæм аргъ, фондз милуан доллары бæрц, æмæ уый ратдзæн «грин картæйы» бартæ, стæй ма дын уыдзæн æмбæстагдзинадмæ фæндаг. Уыцы картæимæ нæ бæстæм бацæудзысты хъæздыг адæм. Уыдон уыдзысты хъæздыг æмæ æнтыстджын, бирæ æхца бахардз кæндзысты æмæ бирæ хъалонтæ фиддзысты, бирæ адæймаг кусдзæн», – расидтис Трамп.

Куы йæ бафарстой, уырыссаг олигархтæн сæ бон уыдзæн æви нæ «сыгъзæрин картæ» дарын, уæд Дональд Трамп дзуапп радта – уыдзæн.

«Æз зонын цалдæр уæрæсейаг олигархы, кæцытæ сты тынг хорз адæймæгтæ. Гæнæн ис», – бафтыдта АИШ-ы президент.