Евросоветы ног президент, Антониу Къошта, Украинæйæн ныфс бавæрдта, цæмæй Евроцæдисмæ баиу кæныны процессы æнæкъуылымпыйæ ацæудзæн. Йæ ныхасмæ гæсгæ, бадзырдтæ 2025-æм азы фыццаг æмбисы райдайдзысты, æппынкъаддæр дыууæ здæхтæй. Снысангонд хъусынгæнинаг Къошта сарæзта Киевмæ йæ балцы рæстæджы.

«Мах уыдзыстæм уемæ фидæны æмæ уыдон хуымæтæг ныхæстæ не сты. Мах адарддæр кæндзыстæм Украинæйæн гуманитарон, экономикон, æфсæддон æмæ энергетикон æххуыс», — загъта Къошта.

Антониу Къошта ма банысан кодта, зæгъгæ, Евроцæдис цæттæ у рахицæн кæнын 4,2 миллиард евро Украинæйы бюджетæн баххуыс кæнынæн афæдзы кæронмæ. Уымæй дарддæр ма, 2025-æм азæй Евроцæдис Киевæн æрвылмæй 1,5 миллиард евро рахицæн кæндзæн.

“Ацы фæрæзтæ райсæм уæрæсейаг активтæй пайда кæнгæйæ, кæцытæй спайда кæнæн ис æфсæддон нысæнттæн дæр”, — загъта Къошта.

Евросоветы президент афтæ дæр расидтис, цæмæй Брюселы æрдгæй уæрæсейаг экономикæйыл æндæвдад фæкарздæр уыдзæн æмæ Уæрæсейы ныхмæ санкциты 15-æм пакеты райсты фæдыл куыст адарддæр уыдзæн.