Yüz minlərlə insanı bir araya gətirən davamlı etiraz artıq çox konkret nəticələr verib – bu haqda “Dəyişikliklər Naminə Koalisiyası”nın liderlərindən biri Zurab Caparidze deyib.

Caparidze bildirib ki, dost ölkələr və beynəlxalq tərəfdaşlardan istənilən xarici reaksiya və dəstək Rustaveli prospektində artıq 26-cı gündür davam edən etirazın nəticəsidir.

“Biz başa düşməliyik ki, oktyabrın 26-da seçkilərin keçirilməsindən sonra bu 57-ci gündür. Demək olar ki, iki ay keçdi və Rusiyanın yalnız bir neçə peyk dövləti seçkilərin nəticələrini tanıyır. Əsas siyasi proses Rustavelidədir və bu proses davam etməlidir. Yarım saatlığına belə çıxan insanların hamısı çox böyük iş görür. Nəhayət, bu etirazla və beynəlxalq dəstəklə o həddə çatacağıq ki, yeni seçkilər təyin olunacaq, bütün siyasi məhbuslar azad olunacaq və bu ölkə Avropaya inteqrasiya yoluna qayıdacaq. Bu ölkənin yaxın bir neçə ildə Avropa İttifaqının tamhüquqlu üzvü olmaq və birdəfəlik sülh yolunda irəliləmək şansı yenə də var” – Zurab Caparidze bildirib.

Zurab Caparidze Gürcüstanın Prezidenti Salome Zurabişvilinin dünənki bəyanatına “İvanişvili saraya gəlsin və mən əyləşərək seçkilərin necə təyin olunması barədə düşünməyə hazıram, seçkilərin təyin olunması tarixi 29-na qədər razılaşdırılmalıdır” münasibət bildirib.

Zurab Caparidze bildirib ki, “İvanişvili bu addımı atmayacaq”.

“Xeyr, bu görüşün baş tutacağını və İvanişvilinin bu addımı atacağını zənn etmirəm. Hələ o mərhələyə çatdığımızı düşünmürəm, amma mütləq ora çatacağıq. Elə bir mərhələ gələcək ki, İvanişvili danışıqlar masasına əyləşməli olacaq və bu danışıqların yeganə məsələsi yeni seçkilər olacaq. Fikrimcə, biz hələ orada deyilik və İvanişvili getdiyinə əmin deyil. Biz bu məqama çatdıqdan sonra onun təhlükəsizlik zəmanətinə ehtiyacı olacaq və danışıqlar masasına əyləşəcək. Ona görə də onun indi gedəcəyinə inanmıram” – Zurab Caparidze bildirib.