Yunanıstan Türkiyə sərhədi yaxınlığında Egey adalarında raket sistemləri yerləşdirəcək. Bu haqda Yunanıstanın müdafiə naziri Nikos Dendias bildirib.

Dendias deyib ki, yeni “Axilles Qalxanı” layihəsi çərçivəsində Egey dənizi adalarında və Türkiyə-Yunanıstan sərhədində həm dəniz, həm də hava məkanını əhatə edən beş növ raket sistemi yerləşdiriləcək.

İlk dəfə olaraq Egey dənizinin müdafiəsi üçün əsas məsuliyyət döyüş gəmilərindən adalarda və materikdə yerləşdirilən uzun mənzilli raket artilleriya sistemlərinə keçəcək.

“Bu, donanmanı, xüsusən də yeni, yüksək qabiliyyətli bölmələrimizi statik ərazi müdafiəsi vəzifələrindən azad edir” – Dendias izah edib.

Türk mediası yazıb ki, Yunanıstan adaları silahlandırmaqla Türkiyəyə təhlükə yaradır.