İran ABŞ ilə danışıqları dayandırıb. Bu haqda məlumatı “CNN” İran xəbər agentliyi “Tasnim”ə istinadən yayır.

Medianın məlumatına əsasən, səbəb İsrailin Livandakı hərəkətləridir.

“İsrail rejiminin Livana hücumlarını davam etdirməsini nəzərə alaraq və Livanın atəşkəsin əsas şərtlərindən biri olmasına baxmayaraq, hazırda bütün cəbhələrdə, o cümlədən Livanda da bu şərtin pozulması səbəbindən, İranın danışıqlar qrupu danışıqları və vasitəçilər tərəfindən mətnlərin mübadiləsini dayandırır” – “Tasnim” yazır.

Agentliyin məlumatına əsasən, İran İsrailin Qəzza və Livandakı müharibələrinin dərhal dayandırılmasını, eləcə də İsrail ordusunun Livandan tamamilə çıxarılmasını tələb edir. “Tasnim”in məlumatına əsasən, bu məsələlərlə bağlı mövqe razılaşdırılana qədər danışıqlar aparılmayacaq.

Bununla yanaşı, agentliyin məlumatına əsasən, Tehran və onun regiondakı müttəfiq silahlı qruplaşmaları Hörmüz boğazının tamamilə bağlanmasını və digər cəbhələrin, o cümlədən Babülməndəb boğazının aktivləşdirilməsini gündəmə gətiriblər.

Bundan əvvəl İsrailin Baş naziri Benyamin Netanyahu Beyrutun cənub ətraflarına zərbələr endirilməsi əmrini vermişdi.

“CNN” İsrailin rəsmi şəxslərindən birinə istinadən xəbər verir ki, Beyruta zərbələr endirilməsi ilə bağlı planlar ABŞ ilə koordinasiya edilib.