Yaponiya və Fransa Yaxın Şərq münaqişəsinin sona çatdırılması və Hörmüz boğazının açılması məsələlərində əməkdaşlıq etmək barədə razılığa gəliblər. Bu barədə Yaponiyanın Baş naziri Sanae Takaiçi və Fransa Prezidenti Emmanuel Makron Tokioda keçirilən danışıqlardan sonra danışıblar.

Sanae Takaiçi bildirib ki, tərəflər “Hörmüz boğazında sərbəst hərəkətin təmin olunmasının və gərginliyin tez bir zamanda azaldılmasının vacibliyini təsdiqləyiblər”.

“Getdikcə ağırlaşan beynəlxalq təhlükəsizlik fonunda, həmfikir ölkələrlə, o cümlədən Böyük Yeddiliyə sədrlik edən Fransa ilə əməkdaşlıq xüsusilə vacib olub. Biz təhlükəsizlik, müdafiə və iqtisadi təhlükəsizlik sahələrində strateji əməkdaşlığı qətiyyətlə gücləndirməyə çalışırıq” – Sanae Takaiçi qeyd edib.

Emmanuel Makron öz növbəsində qeyd edib ki, Fransa və Yaponiya eyni mövqeyə malikdirlər və “boğazda naviqasiya azadlığının bərpası” hər iki ölkə üçün prioritetdir.

Həmçinin, görüşdə liderlər kritik minerallar, mülki nüvə texnologiyaları və süni intellekt sahəsində əməkdaşlıq haqqında razılaşmalar imzalayıblar.