Xalq müdafiəçisi Aleksandre Elisashvilinin işi ilə bağlı Tbilisi Apellyasiya Məhkəməsinə “məhkəmənin dostu” rəyi ilə müraciət edib

Gürcüstanın Xalq Müdafiəçisi Aleksandre Elisashvilinin işi ilə bağlı Tbilisi Apellyasiya Məhkəməsinə “Məhkəmənin dostu” – Amicus Curiae rəyi ilə müraciət edib. Bu barədə Xalq Müdafiəçisinin Aparatı məlumat yayıb.

Məlumata görə, Xalq Müdafiəçisinin Aparatı məhkumun vəkili tərəfindən təqdim olunan məhkəmə qərarı ilə tanış olub. Həmin qərarla Aleksandre Elisashvili terror aktına cəhd etməkdə təqsirli bilinib.

Xalq Müdafiəçisi Aparatının bildirdiyinə görə, terror aktı xüsusi məqsədlə törədilən cinayət hesab olunur və bu cinayətin əsas elementlərindən biri “terror məqsədi”dir. Bu tələb birbaşa Gürcüstanın Cinayət Məcəlləsində müəyyən edilir və terror məqsədinin üç kateqoriyası nəzərdə tutulur. Cinayətin subyektiv tərkibinin zəruri hissəsi olan terror məqsədi məhkəmə araşdırması baxımından mühüm əhəmiyyət daşıyır və bu məsələ məhkəmə qərarında əsaslandırılmış və arqumentlərlə təsdiqlənmiş şəkildə öz əksini tapmalıdır.

Qərarın araşdırılması nəticəsində müəyyən edilib ki, Tbilisi Şəhər Məhkəməsi xüsusi niyyətin, konkret olaraq terror məqsədinin müəyyənləşdirilməsinə lazımi diqqət yetirməyib və bunu avtomatik şəkildə Aleksandre Elisashvilinin siyasi etiraz motivi ilə eyniləşdirib.

Xalq Müdafiəçisi “Məhkəmənin dostu” rəyində beynəlxalq standartları, Avropa İnsan Hüquqları Məhkəməsinin təcrübəsini, həmçinin məhkəmə qərarlarının əsaslandırılması standartları ilə bağlı elmi və digər araşdırmaları nəzərdən keçirib. Sənəddə terror cinayətləri ilə bağlı xüsusi niyyətin müəyyənləşdirilməsinin əhəmiyyəti, eləcə də motivlə məqsədin fərqləndirilməsinin zəruriliyi vurğulanıb.

Xalq Müdafiəçisi ümid etdiyini bildirib ki, təqdim olunan “Məhkəmənin dostu” rəyi hüquqi məsələnin araşdırılması prosesinə daha çox aydınlıq gətirəcək və Apellyasiya Məhkəməsinə sözügedən cinayəti və onun tərkib elementlərini Gürcüstanın Cinayət Məcəlləsinin, cinayətin xüsusiyyətlərinin, əsaslandırma standartlarının və hüququn ümumi prinsiplərinin tələb etdiyi hüquqi dəqiqliklə qiymətləndirməyə kömək edəcək.