Nüfuzlu Amerika nəşri “Washington Post” yazır ki, ABŞ prezidenti Donald Tramp Ukraynaya uzaqmənzilli qanadlı raketlər – “Tomahawk”ların verilməsi imkanını müzakirə edir.

“Washington Post”un məlumatına əsasən, bu məsələ ilə bağlı müzakirələr 11 iyulda baş tutub, lakin hazırkı mərhələdə bu raketlər Kiyevə ötürülməsi planlaşdırılan silah siyahısında yer almır.

Bununla yanaşı, nəşrin məlumatına görə, böyük ehtimalla Kiyev ABŞ-dan icazə alacaq ki, bu icazə əsasında Ukrayna ordusu ehtiyatda olan 18 ədəd ATACMS tipli raketdən tam imkanları ilə istifadə edə bilsin. Bu raketlərin fəaliyyət radiusu 300 kilometrə çatır və onlar həm Moskvaya, həm Sankt-Peterburqa, həm də Rusiyanın dərinliklərində yerləşən hərbi bazalara, aerodromlara və silah anbarlarına çata bilir.

Məqalədə qeyd olunur ki, Tramp Kiyevə “Tomahawk” tipli raketlərin verilməsi barədə qərarı daha sonra qəbul edə bilər – əgər Vaşinqtonun Moskva üzərində əlavə təzyiq alətləri əldə etməsi lazım gəlsə.

Nəşrin müəllifi öz mənbəsinə istinadən bildirir ki, ötən həftə baş tutan telefon danışığı zamanı Donald Tramp Ukrayna prezidentindən soruşub: “Niyə Ukrayna Moskvaya zərbə endirməyib?”, Zelenski isə cavab verib: “Bunu edə bilərik, əgər siz bizə silah versəniz”. Mənbənin məlumatına görə, Tramp bildirib ki, Ukrayna Rusiya üzərində daha çox təzyiq yaratmalıdır – təkcə Moskvaya deyil, həm də Sankt-Peterburqa qarşı.