“Washington Post” – Benyamin Netanyahu Co Baydenə İsrailin İranın nüvə və neft obyektlərinə hücum etməyəcəyini deyib

 
İsrailin Baş naziri Benyamin Netanyahu ABŞ Prezidenti Co Baydenə İsrailin İranın nüvə və neft obyektlərinə hücum etməyəcəyini deyib.

“Washington Post” amerikalı rəsmi şəxslərə istinadən yazır ki, Netanyahunun yumşalmış mövqeyi ABŞ-ın İsrailə qabaqcıl anti-raket hava hücumundan müdafiə sistemi göndərməklə bağlı qərarında əsas amil olub.

Nəşrə əsasən, oktyabrın 8-də İsrailin planları ilə tanış edərkən, Netanyahu Baydenə deyib ki, İsrail hücumunu yalnız hərbi hədəflərlə məhdudlaşdırmağı planlaşdırır.

Amerikalı rəsmi şəxslərdən biri deyib ki , İsrailin intiqamı elə həyata keçiriləcək ki, “ABŞ seçkilərinə siyasi müdaxilə” aradan qaldırılacaq.

Bundan əvvəl İsrail İranın neft obyektlərinə hücum planlaşdırırdı, bu da enerji qiymətlərinin artmasına səbəb ola bilər, nüvə obyektinə zərbə isə münaqişəni genişləndirə və Amerika Birləşmiş Ştatlarının cəlb edilməsinə səbəb ola bilər.

Həmçinin, Körfəz ölkələri İsrailin İranın neft obyektlərinə hücumunu dayandırmaq üçün Vaşinqtona lobbiçilik edirlər və münaqişənin kəskinləşəcəyi təqdirdə onların neft obyektlərinin Tehranın marionetləri tərəfindən atəşə tutula biləcəyindən narahatlıqlarını ifadə edirlər.