Ukraynanın prezidenti Volodimir Zelenski bildirib ki, Ukrayna “Patriot” tipli zenit-raket kompleksləri alıb və razılaşmaların yerinə yetirilməsinə görə Almaniyaya təşəkkür edib.

Gündəlik müraciətində Zelenski qeyd edib ki, Ukrayna müdafiə üçün mühüm nəticə əldə edib.

“Bu gün artıq demək olar ki, bizim hava müdafiəmiz üçün yaxşı nəticədir – Ukraynanın indi daha çox ‘Patriot’u var. Kansler Mertslə yanaşı, Almaniyaya və bizə kömək edən hər kəsə təşəkkür etmək istəyirəm. Razılaşmalarımız icra olunub”, – deyə Zelenski bildirib.

Zelenski vurğulayıb ki, Ukraynanın bütün ərazisinin müdafiəsi üçün daha çox sistemə ehtiyac var, əsas infrastruktur obyektlərinin və şəhərlərin qorunması üçün isə hökumət onların əldə edilməsi üzərində işləyir.

“Və biz bunu yalnız dövlətlər və liderlərlə siyasi səviyyədə deyil, həm də bütün lazımi hava hücumundan müdafiə sistemlərinin istehsalçıları ilə də edirik. Gələn həftə bu məsələ ilə bağlı görüşlər olacaq. Biz tərəfdaşlarımıza bütün hesablamaları, bütün mümkün variantları təqdim etmişik ki, etibarlı hava müdafiəsini necə təmin etmək olar”, – deyə Zelenski əlavə edib.

Zelenskinin sözlərinə görə, düşmənin hücumlarından qorunmaq üçün çoxkomponentli hava müdafiə sistemi lazımdır.