Ukrayna Prezidenti Volodimir Zelenski Brüsseldə keçirilən mətbuat konfransında Ukraynanın Avropa İttifaqına sürətləndirilmiş üzvlüyü imkanları barədə danışıb.

Medianın yazdığına görə, Ukraynanın Aİ-yə sürətləndirilmiş üzvlüyü ABŞ-ın sülh təklifinin son layihəsində də qeyd olunub.

Zelenskinin sözlərinə görə, Ukraynanın Avropa İttifaqına sürətləndirilmiş üzvlüyü ölkənin və tərəfdaşların atacağı addımlardan asılıdır — “əgər bu proses siyasi baxımdan bloklanmazsa”.

“Əgər bu siyasi şəkildə bloklanırsa, mən bu məntiqi anlamıram, amma bunu kimin etdiyini başa düşürəm. Bizim üçün Avropa İttifaqına üzvlük Ukraynanın danışıqlar apardığı və dayandığı təhlükəsizlik təminatlarının bir hissəsidir,” — deyə Ukrayna Prezidenti bildirib.

Bununla yanaşı, Volodimir Zelenski vurğulayıb ki, Avropa İttifaqına üzvlük tarixi Ukrayna üçün mühüm məsələdir.

“Bizim üçün vacibdir ki, bunu başqaları, Rusiya və ya bizi bloklayanlar həll etməsin. Bildiyiniz kimi, Avropa İttifaqının bəzi üzvləri də bizi siyasi səbəblərə görə bloklayır, Ukraynada hansısa islahatın həyata keçirilməməsinə görə yox,” — deyə Zelenski qeyd edib.