Ukrayna Prezidenti Volodimir Zelenski Rusiya ilə əsirlərin mübadiləsi prosesinin başladığını bildirir. Kiyev və Moskva arasında əsirlərin mübadiləsi yaxın günlərdə bir neçə mərhələdə davam edəcək. Hərbi əsirlərin məsələsi üzərində çalışan koordinasiya qərargahında bildirirlər ki, təhlükəsizlik səbəbi ilə azad edilən ukraynalıların sayı ilə bağlı yekun məlumatı daha sonra dərc edəcəklər.

Tərəflər İstanbulda keçirilən son danışıqlar zamanı əsirlərin mübadiləsi ilə bağlı razılığa gəliblər.

“Bizimkilər evdədirlər, ukraynalılar Rusiyanın əsirliyindən evə qayıdırlar. Mübadilə bu gün başladı və yaxın günlərdə bir neçə mərhələdə davam edəcək. İndi geri qayıdanlar kateqoriyası arasında yaralılar və ağır yaralılar, eləcə də 25 yaşdan aşağı olan şəxslər var. Proses olduqca çətindir, çoxlu həssas detallar var, danışıqlar faktiki olaraq hər gün davam edir. Ümid edirik ki, İstanbul görüşü çərçivəsində humanitar məsələlərə dair əldə olunmuş razılaşmalar tam şəkildə həyata keçiriləcək. Hamını geri qaytarmaq üçün maksimum səy göstəririk. Bunun üçün bütün səviyyələrdə işləyirik. Əsirlikdə olan hər bir insanı evinə qaytarmalıyıq. Bizə kömək olan hər kəsə təşəkkür edirik” – Zelenski sosial şəbəkədə yazır.

Mövcud məlumatlara əsasən, bu gün azad edilənlər arasında üç ildən artıqdır əsirlikdə olan Mariupolun müdafiəçiləri var.