Ukrayna Prezidenti Volodimir Zelenski Səudiyyə Ərəbistanında Amerika Birləşmiş Ştatlarının hökumət nümayəndələri ilə görüşün konstruktiv keçdiyini bildirib.

Zelenskinin X sosial şəbəkəsində yazdığı kimi, Ukrayna sülhə doğru irəliləməkdə qərarlıdır.

“Söhbətin tam konstruktiv keçməsi yaxşı haldır. Ukrayna sülhə doğru sürətlə irəliləməkdə qərarlıdır. Biz etibarlı, davamlı və ləyaqətli sülh üçün bütün şəraitin yaradılması üçün üzərimizə düşəni etməyə hazırıq. Komandalarımıza təşəkkür edirəm, çünki hərbi yardım və kəşfiyyat mübadiləsi bərpa olundu. Nümayəndələrimiz Ukraynanın prinsipial mövqelərini Amerika tərəfinə çatdırıblar. Ukrayna havada və dənizdə atəşkəsə hazır idi, lakin ABŞ atəşkəsin quruya qədər uzadılmasını təklif etdi, Ukrayna bu təklifi təqdir edir. Biz təhlükəsizlik təminatlarına ehtiyac, eləcə də avropalı tərəfdaşlarla əməkdaşlığı və gələcək birgə addımları müzakirə etdik” – Zelenski yazır.