Volodimir Zelenski Türkiyənin sonrakı üçtərəfli sülh danışıqlarına ev sahibliyi etməyə hazır olduğunu bildirir.

Ukrayna Prezidenti bu haqda türk həmkarı Rəcəb Tayyib Ərdoğanla telefon danışığından sonra deyib.

“Prezident Ərdoğan Türkiyənin üçtərəfli formatda danışıqların sonrakı raunduna ev sahibliyi etməyə hazır olduğunu qeyd etdi. Biz bu təşəbbüsü təqdir edirik və ümid edirik ki, nəticə verəcək. Prezident Ərdoğana Ukraynanın suverenliyinə və ərazi bütövlüyünə verdiyi dəstəyə, Türkiyənin “İstəklilər Koalisiyası” çərçivəsində dəniz təhlükəsizliyinin təmin edilməsində rol oynamağa hazır olduğuna və Ukraynanın enerji sektoruna kömək etmək üçün gələcək qərarlara görə təşəkkür edirəm” – o yazır.

Bundan əvvəl Volodimir Zelenski bu həftə keçirilməsi planlaşdırılan Ukrayna, Rusiya və ABŞ-nin üçtərəfli görüşünün ABŞ-nin təşəbbüsü ilə təxirə salındığını bildirmişdi.