Ukrayna Prezidenti Volodimir Zelenski Rusiyanın Sumi vilayəti yaxınlığına 50 min hərbçi səfərbər etdiyini bildirir. Zelenski bu barədə media ilə danışarkən deyib.

Bununla yanaşı, Volodimir Zelenski qeyd edib ki, Ukraynanın cavab tədbirləri nəticəsində Rusiya Sumi vilayətinə hücumun “böyük əməliyyat”ını keçirə bilməyib.

Sumi vilayəti Rusiyanın Kursk vilayəti ilə həmsərhəddir və Kursk vilayətində Ukrayna tərəfinin məlumatına əsasən, Ukrayna qüvvələri hələ də müəyyən rayonlara nəzarəti qoruyub saxlayır.

“Onların ən böyük, ən güclü qüvvələri hazırda qüvvələrimizi Kursk bölgəsindən çıxarmaq və Sumi vilayətinə qarşı hücum əməliyyatları hazırlamaq üçün Kursk istiqamətində yerləşdirilib” – Zelenski qeyd edib.

Ukrayna Prezidenti, Rusiya hakimiyyətinin Ukrayna sərhədi boyunca 10 kilometrlik bufer zona yaratmaq istədiyini deyib.

“Ukraynanın dərinliyinə doğru 10 kilometrlik bu bufer zonanın yaradılması üçün, fikrimcə, onlar başa düşürlər ki, imkanları kifayət etmir. Hazırda bu belədir. Fikrimcə, Kursk vilayətində bölmələrimiz düzgün hərəkət etdilər. Bir istiqamətdən çıxdılar və Kursk vilayətinə başqa istiqamətdən daxil oldular. “Ruslar” müharibəni bitirmək istəyənə və ya heç olmasa ilk addımı atana – atəşi dayandırana qədər orada olacağıq” – Zelenski bildirib.

Həmçinin, Ukrayna Prezidenti bildirib ki, son iki gün ərzində ukraynalı hərbçilər işğalçı qüvvələri Donetsk vilayətində, Konstantinovka yaxınlığında 4 kilometr geri çəkilməyə məcbur ediblər.

“Pokrovski istiqamətində olduğu kimi, Konstantinovka yaxınlığında da problemlərimiz var idi, lakin uğurlu döyüşlər oldu. Son iki gün ərzində biz onları Konstantinovka istiqamətində 4 kilometr geri çəkilməyə məcbur etdik” – Volodimir Zelenski bildirib.