Ukrayna Prezidenti Volodimir Zelenski bir daha ölkələri Rusiyaya qarşı sanksiyalar tətbiq etməyə çağırıb. O, bu barədə gündəlik video müraciətində deyib.

Zelenski bildirib ki, müharibəni bitirmək üçün Rusiyaya təzyiqi artırmaq lazımdır.

“Rusiya can almağa yenə davam edir. Nə müddətlər, nə də gözləntilər onlara təsir edir. Qətlləri dayandırmaq istəmirlər. Etməyə çalışdıqları yeganə şey Ukraynanı məhv etməkdir. Biz təhlükələri aydın başa düşürük. Bütün tərəfdaşlarımız da həmçinin təhlükələri aydın başa düşürlər. Rusiyadan sülhə doğru heç bir addım olmadığını hamı görür. Məhz buna görə sanksiyalar lazımdır, təzyiq lazımdır, güc lazımdır. Hər şeydən əvvəl, Amerika Birləşmiş Ştatlarının, Avropanın gücü və beynəlxalq münasibətlərdə sülh və sabitlik istəyən dünyanın bütün ölkələrinin gücü. Əgər Rusiya müharibəni dayandırmaq istəmirsə, onda onun iqtisadiyyatı dayandırılmalıdır” – Zelenski bildirib.