Ukrayna Prezidenti Volodimir Zelenski Böyük Britaniyanın Baş naziri Kir Starmerlə telefon danışığı aparıb. Bu haqda məlumatı Volodimir Zelenski sosial şəbəkədə yayır.

Onun sözlərinə əsasən, məqsəd Cenevrədə ABŞ nümayəndə heyəti ilə danışıqlardan sonra Ukraynada sülhün bərqərar olması perspektivlərini müzakirə etməkdir.

Ukrayna Prezidenti Kir Starmerlə telefon danışığını “yaxşı və məhsuldar” adlandırıb.

Zelenski, Britaniyanın Baş nazirinə Rusiyanın Ukraynanın şəhərlərinə genişmiqyaslı hücumu haqda məlumat verdiyini deyib.

Bununla yanaşı, Zelenskinin izah etdiyi kimi, Rusiya “Ukraynanın Amerika, Avropa və dünyanın bir çox digər ölkələri ilə birlikdə qan tökülməsini dayandırmaq üçün praktiki olaraq 24 saat çalışdığı” bir vaxtda genişmiqyaslı zərbələr endirir.

“Cenevrədə keçirilən görüşlərdən sonra sülhə gedən yolu reallığa çevirə biləcək bir çox perspektiv görürük. Əhəmiyyətli nəticələrdir, lakin hələ görüləsi çox iş var. Bu gün “İstəklilər Koalisiyası”nın görüşü keçiriləcək” – Zelenski sosial şəbəkədə yazır.