Volodimir Zelenski İsraili İsrail ikitərəfli münasibətləri zəiflədə biləcək addımlardan çəkinməyə çağırır.
Volodimir Zelenski bildirib ki, Rusiyadan oğurlanmış Ukrayna taxılının alınması hüquqi məsuliyyət yaradır.
Zelenskinin sözlərinə görə, Rusiya müvəqqəti işğal olunmuş Ukrayna ərazilərindən sistematik şəkildə taxıl oğurlayır və bu məhsulların daşınması işğalla əlaqəli şəxslər tərəfindən təşkil olunur.
“Bütün normal ölkələrdə oğurlanmış məhsulun alınması hüquqi məsuliyyət yaradan hərəkətdir. Bu, xüsusilə Rusiyanın oğurladığı taxıla aiddir. İsrail limanına belə taxılı daşıyan daha bir gəmi gəlib və boşaldılmağa hazırlaşır. Bu, təmiz biznes deyil və ola da bilməz. İsrail hakimiyyəti ölkə limanlarına hansı gəmilərin hansı yük ilə daxil olduğunu bilməyə bilməz. Bu cür əməliyyatlar İsrail dövlətinin öz qanunlarını da pozur. Ukrayna diplomatik kanallar vasitəsilə belə halların qarşısını almaq üçün bütün zəruri addımları atıb, lakin biz görürük ki, belə gəmilər hələ də dayanmayıb”, – deyə o bildirib.
Zelenskinin sözlərinə görə, Ukrayna kəşfiyyat məlumatlarına əsaslanaraq həm bu taxılın daşınması, həm də bu qanunsuz sxemdən qazanc əldə etməyə çalışan fiziki və hüquqi şəxslərə qarşı sanksiyalar paketi hazırlayır.
Xatırladılır ki, Ukrayna Xarici İşlər Nazirliyinin məlumatına görə, 27 apreldə Ukrayna Xarici İşlər Naziri Andriy Sybiha bildirib ki, İsrailin Hayfa limanına işğal olunmuş ərazilərdən oğurlanmış taxıl daşıyan gəmi daxil olub və bununla bağlı İsrail səfiri nazirliyə çağırılıb.
İsrail Xarici İşlər Naziri Gideon Sa’ar isə iddiaların sübutlarla təsdiqlənmədiyini və İsrailə rəsmi dəlil təqdim olunmadığını bildirib.
Məlumata görə, Avropa İttifaqı da bu prosesdə Rusiyaya yardım edən İsrailin bəzi fiziki və hüquqi şəxslərinə sanksiyalar tətbiq etməyi nəzərdən keçirir.
Ukrayna dəniz monitorinq xidmətinin məlumatına əsasən, “Panormitis” adlı Panama bayraqlı gəmi Hayfa yaxınlığındakı sulara daxil olub və 6 200 tondan çox buğda və 19 000 ton arpa daşıdığı ehtimal edilir.
Araşdırmaçı jurnalist Kateryna Yaresko bildirib ki, “Panormitis” taxılı əvvəlcə işğal olunmuş Ukrayna ərazilərindən digər gəmilər vasitəsilə götürüb, daha sonra Rusiya Krasnodar diyarındakı “Kavkaz” limanından yola düşüb.
Kiyev Donetsk, Luqansk, Xerson və Zaporojye bölgələrində, eləcə də 2014-cü ildə Rusiyanın ilhaq etdiyi Krımda istehsal olunan bütün taxılı oğurlanmış hesab edir.