Volodimir Zelenski – Düşmən ərazisində, sərhəd rayonlarında fəal fəaliyyətimizi davam etdiririk və bu tamamilə ədalətlidir, müharibə haradan gəlibsə, ora qayıtmalıdır

Ukrayna Prezidenti Volodimir Zelenski ukraynalı hərbçilərin Belqorod vilayətində mövcudluğunu rəsmən təsdiqləyib. O, bu barədə gündəlik videomüraciətində deyib.

Zelenski bildirib ki, təcavüzkar dövlətin sərhəd rayonlarında fəal fəaliyyətlər Rusiya işğalına əsaslı cavabdır.

“Baş komandan Aleksandr Sirski mənə məlumat verdi ki, biz Kursk vilayətində və Belqorod vilayətində cəbhədəyik. Düşmən ərazisində, sərhəd rayonlarında fəal fəaliyyətimizi davam etdiririk və bu tamamilə ədalətlidir – müharibə haradan gəlibsə, ora qayıtmalıdır” – Zelenski deyib.

Zelenski qeyd edib ki, bu fəaliyyətlərin əsas məqsədi Rusiya tərəfindən sistemli şəkildə bombardmana məruz qalan Sumi və Xarkov vilayətlərində Ukrayna yaşayış məntəqələrini qorumaqdır.

Xatırladaq ki, Ukrayna Prezidenti ilk dəfə olaraq açıq şəkildə Ukrayna hərbçilərinin Belqorod vilayətində mövcudluğunu təsdiqləyib.