Ukrayna Prezidenti Volodimir Zelenski bildirir ki, Avropa Ukraynada müharibəni bitirmək haqda danışıqların iştirakçısı olmalıdır. Zelenski bu barədə Almaniyanın kansleri Fridrix Mertslə aparılan telefon danışığından sonra sosial şəbəkədə yazıb.

Onun sözlərinə əsasən, Kiyev və Berlin müharibənin ləyaqətli sülhlə, mümkün qədər tez başa çatdırılmasının zəruriliyini eyni şəkildə görürlər.

“Müharibənin bitməsinin parametrləri Avropa üçün növbəti onilliklərdə təhlükəsizlik şərtlərini müəyyən edəcək” – Zelenski bildirib.

Onun sözlərinə əsasən, Fridrix Mertslə söhbət zamanı mövqeləri əlaqələndirmək barədə razılaşıblar.

“Təhlükəsizlik məsələləri üzrə müşavirlər bu gün Ukrayna, bütün Avropa və ABŞ üçün ümumi baxışlarımızı razılaşdırmaq üçün onlayn görüş keçirəcəklər” – Zelenski sosial şəbəkədə yazır.

Məlumat üçün bildirək ki, avqustun 7-də Kremldə növbəti həftə Rusiya və ABŞ prezidentlərinin görüşünün keçiriləcəyini təsdiqləyiblər. Bununla yanaşı, medianın məlumatına əsasən, Tramp avropalı tərəfdaşları ilə həmçinin o, Putin və Zelenski arasında üçtərəfli görüşün mümkünlüyü haqda danışıb.