Ukrayna Prezidenti Volodimir Zelenskinin bəyanatına əsasən, Donetsk regionu ilə əlaqədar Amerika tərəfi hər iki tərəf üçün məqbul olan formatın yaradılmasını nəzərdən keçirir, bu da demilitarizasiya olunmuş zona və ya azad iqtisadi zona ola bilər.

Ukrayna və ABŞ tərəfindən birgə işlənilib hazırlanmış 20 bəndlik sülh planını təqdim edərkən Volodimir Zelenski ərazi məsələsinin bütün planda ən çətin məsələ olduğunu bildirib.

Zelenskiyə əsasən, Donetsk, Luqansk, Zaporojie və Xerson vilayətlərində qoşunların yerləşmə xətti bu razılaşmanın tarixi etibarilə faktiki olaraq tanınmış təmas xəttidir. Zelenski qeyd edib ki, bu məsələni müzakirə etmək üçün işçi qrupu toplanmalıdır, qrup münaqişəni bitirmək üçün zəruri olan qüvvələrin yerdəyişməsini, eləcə də potensial gələcək xüsusi iqtisadi zonaların parametrlərini müəyyən edəcək.

“Biz elə bir vəziyyətdəyik ki, ruslar Donetsk bölgəsinin tərk edilməsini istəyirlər, amerikalılar isə bunun “çıxış” olmaması üçün yol tapmağa çalışırlar, çünki biz geri çəkilməyə qarşıyıq. Onlar demilitarizasiya olunmuş zona və ya azad iqtisadi zona, hər iki tərəfin baxışlarını nəzərə alan format tapmaq istəyirlər” – Zelenski qeyd edib.

Ukrayna Prezidenti izah edib ki, müharibənin təmas xəttindən kənarda bitməsini nəzərdə tutan planın birinci versiyası uğursuz olarsa, daha iki variant var. Birincisi, hərbi əməliyyatların davam etdirilməsidir.

İkinci variant müqavilənin qüvvəyə minməsi üçün Rusiyanın qoşunlarını Dnepropetrovsk, Nikolayev, Sumi və Xarkov vilayətlərindən çıxarmalı olduğunu nəzərdə tutur. Lakin, Zelenskinin sözlərinə əsasən, Donetsk və Luqansk vilayətlərində, eləcə də Enerqodarda “azad iqtisadi zona” yaratmaq potensial olaraq mümkündür.

Volodimir Zelenskinin qeyd etdiyi kimi, o, ərazilər və azad iqtisadi zonalar məsələsinin liderlər səviyyəsində həll olunmasını istəyir.

Məlumat üçün bildirək ki, Ukrayna Prezidenti Volodimir Zelenski Ukrayna və ABŞ tərəfindən birgə işlənilib hazırlanmış sülh planının iyirmi bəndini təqdim edib.