Ukrayna Prezidenti Volodimir Zelenski bildirib ki, sülh danışıqlarının mümkün formatları və görüş cədvəli ilə bağlı ABŞ-dən cavab gözləyir.

Zelenskinin sözlərinə görə, Ukraynanın mövqeyi indi əvvəlki illərlə müqayisədə daha güclüdür, çünki ilin əvvəlindən etibarən Ukrayna ərazisinin 590 kilometri azad edilib və Kiyevin nəzarəti altındadır.

“Bu tendensiya əlbəttə ki, işğalçının maraqlarına uyğun deyil. Biz həlak olan rus hərbçilərinin sayını artırmağa davam edirik. Bütün növ sanksiyalarla birlikdə bu, Rusiyanı diplomatiyanı seçməyə məcbur edir”, — deyə Ukrayna Prezidenti bildirib.

Onun sözlərinə görə, Fransa və Böyük Britaniya liderləri Emmanuel Makron və Kir Starmerlə söhbəti zamanı o, Ukrayna kəşfiyyatının əldə etdiyi rusların planları barədə ətraflı məlumat təqdim edib.

“Hərbi və siyasi planlar haqqında məlumat verdim. Biz indi diplomatiyanın gücləndirilməsi üçün hər şeyi etməliyik. Mümkün formatlar və görüşlərin qrafiki ilə bağlı Amerika tərəfinin cavabını gözləyirəm”, — deyə Volodimir Zelenski bildirib.