Ukrayna Prezidenti Volodimir Zelenski fransalı həmkarı Emmanuel Makronla birgə mətbuat konfransında ABŞ tərəfindən rus neftinə qarşı sanksiyaların yüngülləşdirilməsini tənqid edib.

O bildirib ki, bu, Rusiyaya müharibəni davam etdirmək üçün on milyard dollara qədər əlavə qazanc əldə etməyə imkan verəcək.

“Həqiqi təhlükəsizlik və dayanıqlı sülhə nail olmaq üçün bu müharibəyə görə Rusiyaya təzyiqin davam etməsi vacibdir. Rusiyaya qarşı 20-ci sanksiyalar paketinin bloklanmasını dəf etməliyik. Xüsusilə də Amerikanın dənizdə tankerlərdə saxlanılan rus neftinə qarşı sanksiyaları qismən yumşaltmaq qərarına gəldiyini nəzərə alsaq. Təkcə Amerika tərəfindən edilən bu yumşalma Rusiyaya müharibə üçün təxminən 10 milyard dollar qazandırmış ola bilər. Bu, həqiqətən sülhə kömək etmir” – Zelenski bildirib.

Bununla yanaşı, Zelenski Ukraynaya göstərdikləri köməyə görə Fransaya və şəxsən Emmanuel Makrona təşəkkür edib.

“Əlbəttə, bu gün də və hər zaman Emmanuel ilə birlikdə Ukraynada müdafiə və təhlükəsizliklə əlaqəli məsələlər üzrə əsas koordinasiyanı qoruyuruq. Biz birgə müdafiə istehsalına böyük diqqət yetiririk. Həqiqi təhlükəsizlik və dayanıqlı sülhə nail olmaq üçün müharibəyə görə Rusiyaya təzyiqin davam etməsi vacibdir. Avropa İttifaqının və dünyanın digər tərəfdaşlarının qərarı möhkəm qalmalıdır – o elə işləməlidir ki, Rusiyanın illüziyası olmasın. Rusiya bu müharibəni bitirməlidir. Bu səylərdə bizə kömək edən hər kəsə minnətdaram” – Zelenski yazır.