Ukrayna Prezidenti Volodimir Zelenski ABŞ Prezidenti Donald Trampın Ukraynaya səfərinin faydalı olacağını hesab edir.

Zelenski ABŞ Prezidentinin “əgər bu müharibənin bitməsinə kömək edərsə, Ukraynaya gəlməyə və Radada çıxış etməyə hazır olduğu” deyə verdiyi bəyanatını jurnalistlərə şərh edib.

“Düşünürəm ki, prezident Tramp gələ bilsə, faydalı olacaq. O, müharibənin bitməsi planının dəstəklənməsindən danışır. Mən ona dedim – xahiş edirəm, onu görməkdən məmnun olarıq” – Zelenski qeyd edib.

O, ABŞ Prezidentinin təyyarə ilə Polşaya deyil, birbaşa Ukraynaya gəlməsinin arzuolunan olacağını bildirib.

“Əgər Amerika Birləşmiş Ştatlarının Prezidenti Ukraynaya səfər etsə, onun təyyarə ilə Polşaya və sonra qatarla səyahət etməsi yox, Ukraynaya uçması arzuolunandır, onda əminliklə atəşkəsə ümid edə bilərik” – Ukraynanın lideri qeyd edib.

Zelenski vurğulayıb ki, Donald Trampın özü buna hazır olduqda, Ukrayna istənilən vaxt ABŞ Prezidentinin səfərinə hazırdır.