Viktor Orban – Razılaşırıq ki, Avropa ölkələrinin müdafiə imkanlarını gücləndirməliyik, bu səy Brüsselli bürokratların deyil, üzv ölkələrin imkanlarını genişləndirməlidir

Macarıstanın Baş naziri Viktor Orban bildirir ki, Avropanın müdafiə imkanlarının gücləndirilməsini dəstəkləyir.

Bu haqda Orban Fransa Prezidenti Emmanuel Makronla keçirilən görüşdən sonra X sosial şəbəkəsində yazıb.

“Fransadakı görüşlərim təsdiq etdi: sülhün şərtləri ilə bağlı fikir ayrılığımız olmasına baxmayaraq, razılaşırıq ki, Avropa ölkələrinin müdafiə imkanlarını gücləndirməliyik. Bu səy Brüsselli bürokratların deyil, üzv ölkələrin imkanlarını genişləndirməlidir” – Orban yazır.

Məlumat üçün bildirək ki, Viktor Orban Yelisey sarayında Fransa Prezidenti Emmanuel Makronla görüşüb. Bundan əvvəl Makron televiziya müraciətində Fransanın nüvə silahının avropalı tərəfdaşlar üçün paylaşılmasının mümkünlüyündən danışıb.