“Vahid Neytral Gürcüstan” ictimai hərəkatının təsisçilərindən biri Vato Şakarişvilinin bəyanatına əsasən, “Vahid Neytral Gürcüstan” partiya olaraq formalaşıb. Şakarişvili bu haqda brifinqdə deyib.

O, yaxın vaxtlarda partiyanın təsis qurultayının keçiriləcəyini və parlament seçkilərinə hazırlıqlara başlanılacağını bildirib.

“Təşkilatımız “Vahid Neytral Gürcüstan”ın əsasının qoyulmasından bir ildən artıq vaxt keçib. Bu müddət ərzində gürcü cəmiyyəti ilə birlikdə ölkənin daxilində və ya kənardan vətənimiz üçün yalnız siyasi sabitlik və sülh baxımından deyil, həm də sözün əsl mənasında Gürcüstanın varlığı/yoxluğu ilə bağlı ekzistensial məsələ qaldıran bütün eybəcərlikləri aktiv şəkildə ifşa etməyə çalışdıq.

Dünyanın aparıcı dövlətləri bu günə qədər ölkəmizə yalnız öz maraqlarını təmin etmək və ehtiyaclarımızı görməzdən gəlmək prizmasından baxdıqları üçün ötən bir il ərzində Avropa İttifaqı və Amerika Birləşmiş Ştatları tərəfindən ölkəmizə qarşı aparılan və əsas məqsədi yenə də hakimiyyəti istənilən formada uzaqlaşdırmaq və onların agentlərini idarəçiliyə qaytarmaq olan qeyri-bərabər mübarizə haqda dəfələrlə bəyan etmişik. 2024-cü ilin parlament seçkilərində “Gürcü Arzusu” partiyası xalqdan yenidən mandat aldıqdan sonra vəziyyət sakitləşmək və xarici qüvvələrin Gürcüstana və gürcü xalqına qarşı təsir göstərməyi müvəqqəti olaraq dayandırması yerinə, problemlər daha da artır.

Aydındır ki, bu gün Avropa İttifaqında bütün Avropa dəyərləri demək olar ki, tamamilə deqradasiyaya uğrayıb, Brüsselin bürokratları isə Avropa ideyasına deyil, qeyri-rəsmi oliqarxik idarəçilərə xidmət edirlər və məqsədi xalqın sıfır dəstəyi fonunda hakimiyyəti zorla devirmək olan Gürcüstandakı siyasi qrupları açıq şəkildə dəstəkləyirlər.

Bununla eyni zamanda, Avropa İttifaqında LGBT təbliğatı bütün gücü ilə tüğyan edir, açıq şəkildə xristianlığa, ölkələrin kimliyinə, keçmişə və adət-ənənələrə qarşı mübarizə aparırlar. Gənclik kəskin təhlükə ilə üzləşib. Ursula fon der Laienin imzaladığı və üzv, eləcə də danışıqlar prosesində olan ölkələr üçün yerinə yetirilməsi məcburi olan bu yaxınlarda qəbul edilmiş 2026-2030-cu illər üçün LGBT Strategiyası Avropanın gənc nəslinə mənəvi ilə birlikdə fiziki deqradasiya vəd edir.

Qeyri-rəsmi oliqarxik idarəçiliyin öz simasını dəyişdirməyə çalışdığı Amerika Birləşmiş Ştatlarında vəziyyət heç də az ağır deyil, nəticədə Tramp administrasiyasının “Dərin Dövlət”in təsirlərinə qarşı yalnız sözlə mübarizə apardığı vəziyyətlə qarşı-qarşıyayıq.

Məsələn, oktyabrın 4-də marginal agentura şəbəkəsi Gürcüstanda hakimiyyəti devirməyə cəhd edərək prezident sarayına hücum təşkil edərkən, Avropa İttifaqı açıq şəkildə dövlət çevrilişi cəhdini təşviq etdi və bunu “sülh yolu ilə çevriliş” adlandırdılar, ABŞ isə agentlərin cinayətkar əməllərinə yalnız “strateji səssizlik”lə cavab verdi.

Hesab edirik ki, belə şəraitdə hakimiyyətin özü əsl avropalı, demokratik və ədalətli dəyərlər bu birlikdə dirçələnə qədər mənəvi, siyasi və iqtisadi cəhətdən deqradasiyaya uğramış Avropa İttifaqına qoşulmaqdan imtina etməlidir. Təəssüf ki, bu gün elə görünür ki, Avropa İttifaqına, eləcə də Amerikaya suveren Gürcüstan heç nəyə lazım deyil.

Kənardan gələn görünməmiş təzyiq, hakimiyyətin bu istiqamətdə fəaliyyətsizliyi və müxalifətin anti-gürcü fəaliyyəti fonunda siyasi partiyanın əsasının qoyulduğunu elan etmək qərarını verdik. Ölkəmiz və xalqımız qarşısında daşıdığımız məsuliyyəti nəzərə alaraq, Avro-illüziya təsiri altında olan hakimiyyətin və vətənsiz, agent müxalifətinin ümidinə artıq qalmayacağıq. Partiyanın təsis qurultayı yaxın vaxtlarda keçiriləcək və biz parlament seçkilərinə hazırlıqlara başlayacağıq.

Gürcüstan üçün neytral statusun elan edilməsi ölkəmizin malik olduğu coğrafi üstünlük nəzərə alınmaqla, ölkəmizin suverenliyinin və iqtisadi imkanlarının tanınması olardı. Buna görə də biz dünya üçün maraqlıyıq və bu maraqdan hər hansı bir ölkənin və ya birliyin maraqlarını güdmək üçün deyil, dünyanın aparıcı ölkələrinə ölkəmizin sülhünün, sabitliyinin və iqtisadi rifahının nəinki onlardan heç birinin maraqları ilə ziddiyyət təşkil etmədiyini, əksinə məhz belə bir Gürcüstanın mövcudluğu şəraitində hər bir oyunçunun öz maraqlarını təmin etmək imkanına malik olduğunu göstərmək üçün istifadə etməliyik” – Vato Şakarişvili bildirib.