Vağzal meydanının yaxınlığında, dağıntılar arasında ikinci mərhumun cəsədi tapılıb. Bu barədə jurnalistlərə Tbilisi Polis Departamentinin direktoru Vaja Siradze məlumat verib.

Siradzenin sözlərinə görə, hazırkı məlumata əsasən, dağıntı nəticəsində iki nəfər həyatını itirib.

“İşlər intensiv şəkildə davam edir. İndi əlavə olaraq daha bir nəfərin cəsədi tapıldı. Əvvəldən də qeyd etdiyim kimi, bir nəfər həlak olmuşdu, indi isə daha biri əlavə olundu. İşləri davam etdiririk və əlavə detalları da bildirəcəyik. Hazırda bizdə olan məlumata əsasən, iki nəfər həyatını itirib – biri kişi, biri qadın. Bir qadın isə tibbi müəssisədədir”, – deyə Vaja Siradze bildirib.

Onun sözlərinə görə, hadisə yerində işlər davam edir. Klinikalıq yerləşdirilmiş yaralının vəziyyəti barədə isə Vaja Siradze bildirib ki, onun həyatı üçün təhlükə yoxdur.

Xatırladaq ki, bir neçə saat əvvəl Stansiya meydanının yaxınlığında yerləşən yaşayış binasının bir hissəsi uçub.