Avropa Komissiyasının prezidenti Ursula fon der Lyayen bəyan edib ki, Avropa İttifaqı Kosovoya qarşı tətbiq olunan məhdudiyyətləri ləğv edir və ölkəyə əhəmiyyətli maliyyə yardımı ayıracaq.

“Bu, Kosovo üçün yaxşı xəbərdir. Son yerli seçkilərdən sonra şimalda yerli idarəetmənin təhvil verilməsi prosesi dinc şəkildə keçib”, – deyə fon der Lyayen sosial şəbəkədə yazıb.

Avropa Komissiyasının rəhbərinin sözlərinə görə, vəziyyətin yaxşılaşması səbəbilə Avropa İttifaqı Kosovoya dəstək üçün konkret addımlar atmağa hazırdır.

“Biz Kosovoya qarşı tətbiq olunan tədbirlərin ləğvini planlaşdırırıq. 216 milyon avro məbləğində maliyyə yardımı göstərməyi və gələn ilin əvvəlində əlavə olaraq 205 milyon avro ayırmağı nəzərdə tuturuq”, – deyə fon der Lyayen bildirib.