Ursula fon der Layen: Son seçkilər Ermənistan demokratiyasının gücünü bir daha göstərdi; islahat kursu davam edir və Ermənistan bizim dəstəyimizə arxalana bilər

“Sadə bir mesajla çıxış edirəm: Ermənistan bizim dəstəyimizə arxalana bilər,” – bu barədə Avropa Komissiyasının Prezidenti Ursula fon der Layen sosial şəbəkə hesabında yazıb.

Fon der Layenin sözlərinə görə, İrəvan islahat kursunu davam etdirir və Avropaya yaxınlaşır.

“İrəvana bu qədər tez qayıtmaq xoşdur. Son seçkilər bir daha Ermənistan demokratiyasının gücünü göstərdi. Ermənistan islahat kursunu davam etdirir və Avropaya yaxınlaşır. Buna görə də sadə mesajım budur: Ermənistan bizim dəstəyimizə arxalana bilər. Biz sizinləyik,” – deyə o bildirib.

Avropa Komissiyasının Prezidenti Ursula fon der Layen Ermənistanda rəsmi səfərdədir. Səfər çərçivəsində o, Ermənistanın Baş naziri Nikol Paşinyanla danışıqlar aparacaq. Daha əvvəl, iyulun 1-də o, Azərbaycanda səfərdə olub və Prezident İlham Əliyevlə görüş keçirib.