Ümumi Gürcüstanın Katolikos-Patriarxı İkinci İlia 93 yaşında dünyasını dəyişib.

Bu haqda bəyanatı Gürcüstanın patriarxlıq taxtının varisi, mitropolit Şio Muciri klinika yaxınlığında verib.

Sağlamlıq vəziyyətinin pisləşməsinə görə İkinci İlia əvvəlcə Çapidze Klinikasına, daha sonra isə “Qafqaz Tibb Mərkəzi”nə aparılıb.

İkinci İlia (dünyəvi adı ilə – İrakli Qiorqi oğlu Şiolaşvili) 1933-cü ilin yanvarın 4-də Orconikidzedə (Şimali Osetiya) Qiorqi Şiolaşvili və Natalia Kobaidzenin ailəsində dünyaya göz açıb. 1960-cı ildə Moskva İlahiyyat Akademiyasını bitirib. 1957-ci ildə rahib olub və İlia adlandırılıb; 1957-ci ilin aprelin 18-də Sioni patriarxal məbədində müqəddəs xidmətçi (iyerodiakon) təyin edilib; 1959-cu ilin mayın 19-da Müqəddəs Serqis Monastırının Lavrasında keşiş-rahib təyin edilib; vətənə qayıtdıqdan sonra Batumi kafedral məbədində ruhani təyin edilib; 1960-cı ilin dekabrın 19-da baş keşiş (iğumen), 1961-ci ilin sentyabrın 16-da isə arximandrit rütbəsinə təyin edilib; 1963-cü ilin avqustun 26-da Şemokmedeli yepiskop titulu ilə Katolikos-patriarxın xor yepiskopu təyin edilib; 1963-1972-ci illərdə Mtsxeta İlahiyyat Seminariyasının birinci rektoru olub; 1967-ci ildə Abxaziya Yeparxiyasına keçirilib; 1969-cu ildə mitropolit rütbəsinə yüksəldilib; 1977-ci ilin noyabrın 9-da patriarxın varisi təsdiq edilib.

O vaxtkı Tsxum-Abxaziya mitropolitini 1977-ci ilin dekabrın 23-də Sioni məbədində keçirilən XII Kilsə Yığıncağında yekdilliklə Katolikos-Patriarx seçdilər. Həmin ilin dekabrın 25-də Svetitsxoveli məbədində Patriarxın taxta çıxma mərasimi keçirildi.

Gürcüstanda Sovet dövründən kilsə və monastırların bərpası və tikintisi, Gürcüstan Ortodoks Kilsəsinin avtokefaliyasının bərpası, ilahiyyat məktəblərinin və gimnaziyaların açılması, yeparxiyaların, kilsə icmalarının və dini şəxslərin sayının artması, beynəlxalq təmasların dərinləşməsi, bir sıra mühüm nəşrlər və elmi və təhsil təşəbbüsləri İkinci İlianın adı ilə bağlıdır.

1990-cı ildə Dünya Patriarxlığı tərəfindən Gürcüstan Kilsəsinin avtokefaliyasının tanınması İkinci İlianın yaradıcılığında xüsusi yer tutur. İkinci İlia 20-dən çox ikona çəkib, bunların arasında Əqdəs Üçlük fərqlənir. Həzrətlərinin xeyir-duası ilə Bibliya, bir sıra ilahiyyat topluları, broşürlər və kitab müasir gürcü dilində nəşr olunmuşdur. Həmçinin, İkinci İlia körpələrin ümumxalq vəftiz ənənəsinin əsasını qoyub.